فن الاقناع والتأثير النفسى

فن الاقناع والتأثير النفسي

انك تدخل جوة دماغ الشخص الي بتكلمه وتفهم نفسيته وتعرف ازاي ممكن تتعامل معاه وتشوف الدنيا بعين مختلفة ، عين فاهمة ، عين عارفة وعين بتقدر تقيم ، ده ممكن يبقى حلم ناس كتير مننا عايزين يتعرفوا على سيكولوجية العقل البشري واسهل الطرق في التعامل معاه ، بنستخدم الكلمة كتير بس لحد دلوقتي بنتفرج على ناس عرفوا يوصولوا لمناصب كبيرة اوي ومش مننا غير اننا نبص عليهم ونستعجب ونستغرب هما عملوها ازاي وقبل مانتجنن بنبدأ نبرر بأي شكل ، ونقول حاجات امثال ان الناس دول منافقين ، كدابين ، حرامية ، معندهومش مبادىء وبعض مننا نسى ان مش دايما الواحد بيوصل لما يتخلى عن مبادئه ، بالعكس ، الي بيوصل فينا هو الشخص العارف امتى يتكلم وامتى يقول ايه وازاي ولمين ..

الناس الي عرفوا ينجحوا دول ناس عرفوا يوصلوا وقبل مايكونوا عرفوا يوصلوا لاهدافهم فهما عرفوا يوصلوا لناس تانية زيهم ، احنا بدأنا ناس وانتهينا ناس وبنموت نقابل ناس وبنعيش نقابل ناس اكتر ، فلو اقتنعت بده او لا ، لو سمعت الف اسطوانة بتتكلم عن التنمية البشرية والنجاح والتحفيز وتحقيق الاهداف ومفيش حاجة فيهم بتفهمك اد ايه الناس مهمين في كل حاجة انت بتعملها في حياتك ، فخليني اقولك ، مش مهم ، ارمي كل ده ، لان في القرن الواحد والعشرين لو معرفتش تتعامل مع الناس مش هتعرف تعمل حاجة في حياتك ، سواء اقتنعت او لا ايه رايك لو تجرب بس مجرد انك تجرب تتخيل اي هدف انت عايز تحققه .. واكتشافك انك هتلاقي ناس فيه ، ناس هتعدي عليهم علشان تقنعهم بنفسك وتحقق هدفك او ناس هتكون معاهم لما تحقق هدفك ، المهم في كل الحالات هيكون فيه ناس ، ومهمتك انك تعرف ازاي ممكن تتعامل مع الناس .. فيه علوم كتير ظهرت عن فكرة (التعامل مع الناس) بس الكلام ده بقى قديم ومش مميز واي حد بقى يكتب كتاب في نصائح التعامل معاهم ، انا هنا بجيبلك الناس من وجهة نظر نفسية ، بفهمك نفسك والي بيسري عليك بيسري على الكل ، ولو عرفت نفسيات الناس بتتحرك ازاي وتقنيات التحكم فيها هتقدر تعرف ازاي انت شخصيا تقدر تتعامل مع نفسك ومع الناس ، اقرب الناس ليك او حد حتى اي حد في الشارع بتقابله لأول مرة وممكن متشوفوش تاني ، المهم انك تسيب جواه اثر ولمسة ..

فلو كنت من صغرك بتحلم انك تبقى طيار او مهندس او عالم ذرة او اغنى واحد في العالم ، فمهما كان الحلم بتاعك ، اعرف انك في النهاية بتدور على انك ترضى حد معين مش لازم يكون انت ، بس هتكتشف انك عايز توصل للناس ، لانهم جنتك على الارض ودنيتك الي لو عرفت تعيشها هتقدر تكسبها دنيا واخره ..

الراجل الي فقد شغله ، لانه ببساطة مش عارف يتعامل مع مديره ومش عارف يوصله وجهة نظره او الشخص الي فقد صحابه لانهم مش مقتنعين بيه او البنت الي حبيبها سابها لانها مش قادرة توصله او الشاب الي حبيبته سابته لانها مقتنعتش بشخصيته او العميل الي سابك علشان انت ببساطة مش مقنع كفاية او الابن الي عقرك علشان انت مش اب ناجح او الموظفين الي تحايلوا ضدك علشان انت مدير فاشل ، اين كان موقعك من الاعراب فانت عندك مشاكل في اقناع الناس بنفسك وبكلامك وبوجودك ..

وهنا جات اهمية التنويم الضمني علشان تثبت اهمية الاقناع لكل واحد فينا ، الي عارف وحتى الي مش عارف ، جات عبارة عن تقنيات نفسية كاملة تخليك تقدر تزرع افكارك في عقل الناس الي حواليك بمجرد مابتتكلم ، لمجرد انك موجود ، الاسم بالكامل للتنويم الضمني هو فن الاقناع والتاثير بالتنويم الضمني ، ومعناه انك حرفيا تقدر تخلي اي شخص يقتنع بيك في اي مكان وفي اي وقت وتحت اي ظروف ، وده عن طريق استخدامك لتقنيات نفسية مش هتلاقيها في كتب علم النفس وبتستخدمها تجاه الشخص وهو في حالة الترانس او الغشية علشان تكتشف انه صدق كلامك وبدأ يعمل بيه ، تخيل حياة كاملة كلها اقناع وتاثير على كل واحد جمبك قدامك او وراك ، تخيل حياة مفيهاش مجادلة ، تخيل حياة مفيهاش لأ !

من تقنيات التنويم الضمني تقنية اسمها براعة الفم ، وهي تقنيات مكونة من 17 نمط لغوي لروبرت ديلتز واحد من عباقرة الاقناع الدوليين ، والي كون الانماط اللغوية علشان تخليك تقدر ترد على اي مجادلة او مناقشة او معتقد ممكن يخالفك بأي شكل ، حصلك قبل كده ان حد فحمك وحسيت انك مش عارف تنطق ؟ ده واحد كان بيستخدم نمط او اتنين من ال 17 دول ، مش مهم يكون دارس علشان يخليك مش عارف ترد عليه ، المهم انه فهم ..

وفي النهاية لو انت شايف ان ده من اولوياتك تقدر دايما تعرف اكتر عن التنويم الضمني ، ولو انت شايف ان ده مش وقته فخليني اقولك ، انك لو بدأت حياتك بس لسة متعرفتش على انسب اسلوب تعامل بيه الناس وتفهمهم وتقنعهم بيه بنفسك فنصيحة عيد تقييم حساباتك لان احتمال تكون واقف في مكان غلط .

كنت ناوي اعمل دورة يوم 15/10 الجاي ان شاء الله بس للاسف ارتبطت بدورات تانية في خلال الشهر اولهم كان من يومين ، بس لو تحب تلحق مكانك وتتعرف على العلم الي بينتشر دلوقتي على الانترنت ووسط الناس اسرع من اي علم تاني ، ابعت على arabhd@maktoob.com واكتب في العنوان "حجز مكان بكورس التنويم الضمني " ومعاه رقمك واسمك وهنبعتلك في وقتها ..

نهاد رجب

اول مدرب عربي في تقنيات الاقناع النفسي والتأثير بالتنويم الضمني

http://www.nihadragab.com