الإقناع بكسر الشخصية
كسر الشخصية هي طريقة مستخدمة لهدم شخصية شخص ما او كينونة مجموعة من الاشخاص ..
والطريقة ديه ببساطة بتخليك تقدر تخلي اكثر الاشخاص صعوبة بيقع وبيتكسر قصادك ، حاجة صعبة بس مجرد اني كشفت عنها ده مش معناه اني بدعمها بس ده لاني اكتشفت بعض الناس بيحاولوا يمارسوا نفس الطريقة ديه ضدنا كأشخاص وفي الاخر بنكتشف اننا بنفضل السكوت وده لانهم نجحوا ببساطة انهم يكسرونا ، خلينا استعرض فكرة كسر الشخصية ..
الموضوع بيحصل انك اولا : بتغرق الشخص بالاتهامات .
السيناريو المعروف انك تفصل الشخص وتبدا تديله اتهامات بكسر الحدود وتجاوز المحرمات ، وممكن تبدأ بحاجات بسيطة هو هيوافق عليها بسهولة ، ومنها تنتقل لاتهامات اكبر بتجاوز بعض القيم المهمة والمبادىء وتشوفه بيبدأ يحس بالذنب والعار .
وكل ما يبقى معاك ناس اكتر وانت بتمارس العملية ديه على الشخص كل مايبقى تأثيرها أقوى ...
مثال : أحمد انت من 10 ايام اتصلت بابراهيم وانت عارف انك المفروض تستناه هو الي يكلمك وديه مش اول مرة انت عملت كذا وكذا واشتريت من البقال طماطم (مثلا) ومكنتش كويسة ومفكرتش ترجعها ، وكلمت الشخص الفلاني بطريقة وحشة ومرضتش تصالحه ، انت في حياتك بتغلط ومبترضاش تصلح غلطك وده بيبان عليك لما بتعامل مديرك في الشغل ، الخ ...
من المثال البسيط ده ممكن تلاحظ اننا بدأنا بحاجة عادية بتحصل كل يوم وهو انه اشترى طماطم بايظة ومرجعهاش فخدنا المثل ده وضفنا عليه مثال تاني وتالت لحد ما اتهمنا احمد ان ديه عادة فيه وصفة سلبية في شخصيته واتهمناه بالسلبية بشكل عام ..
ثانيا : استمر لحد ماتلاقيه بينهار وابدأ حسن منه
مع الوقت واستمرارك في اتهام الشخص وتبدأ تشوف اشارات ان الشخص ده نفسه بدأ ينهار ، دورك انك تبدأ تلحقه وتعيدله التوازن من تاني .
وده من خلال انك تظهرله انك سامحته وتقرب منه بحب وعطف وممكن تحضنه او تطبطب عليه حتى ، كل الحاجات البسيطة ديه هياخدها كانها القشة الاخيرة الي هيتمسك بيها علشان يحافظ على ماء وجهه وساعتها هيستقبل منك اي اقتراحات مباشرة هتقدمهاله لانك كنت في مصدر قوة وشاف نفسه وهو بيتدمر تحت ايدك ولما انت اظهرتله العطف والحب واديته امل انك سامحته (مع ان ده مش دورك) هيبدأ يخضعلك ويتبع اوامرك ..
ملحوظة الطريقة ديه ممكن تستخدمها مع الموظفين تحت ادارتك ومش متبعين للاوامر ..
من فضلك متستخدمهاش مع اولادك او زوجتك او زوجك او حد قريب منك .
مثال حي :
استخدامي لنفس التقنية مع شاب عنده 28 سنة مبيصليش ، عرفت عنه 6 معلومات سلبية بيعملها بدات ابنيهم على بعض علشان اوصله فكرة انه (ضعيف وجبان) لحد مابقى قصادي شاب عنيه بتدمع وباصص في الارض ساعتها بس لمست كتفه وقولتله "ألم يأن للذين أمنوا أن تخشع قلوبهم لذكر الله"
عايزك تتخيل معايا قوة الاية في اللحظة ديه بالذات مع الشخص ده ..
نهاد رجب
http://www.nihadragab.com
ليست هناك تعليقات:
إرسال تعليق