فتح عنيك
لو بتعدي عالتحرير ، في الميدان هتلاقي مطعم اسمه هارديز ، قصاده فيه سلم مترو ، بص على السور الي قصاد المطعم عند المترو ، هتلاقي واحد قاعد وحاطط في ودنه سماعات ، وقصاده محلات بيع الشنط ومطاعم وناس كتير بتعدي من قصاده ، اساله عني ، هيسلم عليك وهتكتشف انه انا :)))
فتح عينك النهاردة مقالة عايزك بيها تفتح ادراكك وتعرف الناس وتشوفهم وتفهمهم ، ديه هواية من هواياتي اني اروح اقعد هنا نص ساعة او ساعة كل يوم ، وابدأ اتفرج ، بيعدي عليا أمم ، ناس كتير ، اتنين مخطوبين او متجوزين او مش متجوزين او راجل او ست ، شيخ او بنت ، ولد او طفل ، كل انواع الناس بيعدوا قدامي ، وببدأ لعبتي ، بفتح عيني
الموضوع بسيط ، في مقالة اتكلمت عن انك تلاحظ الناس وتاخد من كل واحد معلومة ، ديه المرحلة الاولى ، المرحلة التانية ، انك تعرف هما بيفكروا في ايه وهنا احب انوه انك مش هتقرى الافكار بس هتلاحظ بعنيك وهتكتشف ان عقلك بيقولك معلومات انت مش متخيل ان اي حد ممكن يعرفها من غير مايسأل .
في المرحلة ديه انت بتراقب الناس الي بتشتري مثلا وبتعرف مين هيشتري ايه ومين بتتفرج بس ومش عايزة تشتري ، مين بيحب خطيبته ومين بيضحك عليها ، مين بيكلم عالموبايل بنت ومين بيكلم ولد ، مين بيحب ومين بيكره ، ديه مش فكرة فراسة ولا قوانين قراية الافكار ، انا بتكلم النهاردة عن تقنية اسمها المعايرة او ال
Calibration
كمعالج بالتنويم الايحائي ، لو انا عبقري في استخدام تقنيات التنويم فكل ده ملوش لازمة لو معرفتش اعاير ، استخدام التنويم المغناطيسي او الايحائي مش بيقف بس عند الاسترخاء او الترانس ، وان الشخص يغمض عينه وافضله اقوله نام وفي الاخر مينامش، وساعات انا في جلساتي مبستخدمش الاسلوب ده خالص وبستخدم الرابيد اندكشن او التنويم السريع لديفيد المان وده ليه مميزات وده ليه مميزات بس الفكرة ان الموضوع مش بيبقى تنويم بس . خليني احكيلك موقف .
اتعاملت مع واحد كان جايلي في جلسة لانه متوتر دايما وقلقان ، وعايز بالتنويم الايحائي يتعالج ويتحكم اكتر في نفسه ، بعض مدارس التنويم الايحائي في الموضوع ده بتعالجه عن طريق انها تخلي الشخص يدخل في ترانس وتبدأ تخليه يشوف نفسه واثق ومتمسك وهادي وده بيأثر على سلوكه بعد كده ، الشخص ده جالي في مرة وهو جاهز علشان ينام ، بدات معاه بتقنيات معينة وبعد كده استاذنته اعمل تليفون ، روحت غبت اربع دقايق رجعت لاقيته بيتسلى في ورقة فاضية وعمال يرسم دواير ، انا استغربت من فكرة الدواير بس جاتلي فكرة ، قولتله بص ، انا عايزك ترسم دوارية مفتوحة ، ساعتها هو مفهمش انا كنت بحاول اعمل ايه ، قولتله بس ارسمها ، فرسمها ، قولتله هايل ، فيه عندك طرفين مش مربوطين والدوارية مش كاملة ، عايزك تمد طرف فيهم وتنزله وبدات اوجهه في الرسم لحد في الاخر ماخليته يكتب اسم الله من رسمة دوارية مش مكتملة ، هو مفهمش وما ادركش انه رسم لفظ الجلالة الا لما قولتله وساعتها استغرب شوية، فسالته تعرف تعملها تاني ؟ قالي اها مش حاجة يعني قولتله طب اعملها ، وبدا يرسم دايرة مفتوحه ويمد اطرافها لحد مايوصل لرسمة اسم الجلالة "الله" . عملها تلات اربع مرات وفي الاخر دخلته في التنويم . كل الي عملته اني ربط مشكلته بالدايرة الي بتدور حوالين نفسها خليته يقدر يفتحها ويعرف انه دايما يقدر يخرج من اي مشكلة بالرجوع لله .
في موقف تاني حصلي من فترة لبنت كانت بتكلمني عن مشاكلها كانت ساعتها بتشرب بيبسي بشفاطة ، بعد ماشربت بدات تتكلم وتمسك الشفاطة وتلعب فيها ، اكتشفت انها كل ماتقول مشكلة تربط الشفاطة عقدة وهكذا لحد ماخلصنا اكتشفت انها عقدتها تلات مرات وحطيتها في الشنطة ، لما سالتني هنبدأ امتى قولتلها على الميعاد وطلبت منها انها تروح البيت تجيب كل الشفاطات او الحاجات الي هي عقدتهم ، وتبدأ تبص لكل واحدة فيهم وتحاول تفتكر الموقف الي كانت فيه ساعتها وتبدأ تفكها واحدة ورا التانية ، قالتلي ليه ، قولتلها لو هتساليني ليه في الي بعمله يبقى ملوش لازمة انك تيجي تسمعيني ، ولو انتي شايفة انك بتضيعي وقتك فممكن عادي منتكلمش عن مشاكلك تاني انا كل الي عايزه منك انك تنفذي الي بقولهولك، البنت استغربت من ردي وقالتلي اوكي حاضر ، واتصلت بيا وقالتلي انا فكيت كل الي انا كنت ربطاه ، اعمل ايه تاني ، قولتلها ابدا نامي كويس النهاردة وهشوفك بكرة ولما جاتلي دخلتها في تنويم وبدات امسك مشكلتها الي كانت جاية فيها واربطها بفكرة عقدة الحبل المربوط وان كل مشكلة هيا عقدة في حبل كبير وبدأت اخليها تفك العقد تحت التنويم وكان الموضوع ناجح بشكل كبير جدا انها قالتلي بجملة واحدة قريب "انا حاسة ان كل مشاكلي اتفكت عني وبقيت بعرف اخد نفسي" . الي فكرني بالموضوع ده هو نفس الموقف حصل مع صديق ليا امبارح ووجهته بنفس الاسلوب بس مكنش فيه تنويم وحصل بشكل عابر مش اكتر.
التفسير : الشخص بيعمل سلوك ما بينم عن المشكلة الي جواه ، اي سلوك زي رسم دواير او تعقيد احبال او مناديل وهكذا ، في اللحظة الي هتعكسي السلوك ، كانه اقتراح مباشر للاواعي انه يعكس المشكلة ويحلها ، وخد بالك ان مش كل مرة هتلاقي الشخص بيعمل تصرف ما ، وحل ده تقنية اسمها الاسترجاع بالعمر واخلى الشخص يتخيل نفسه في مكان تاني وفي زمن تاني، بيعمل حاجة ما ، دايما التقنية ديه بتنجح لان الي الشخص بيعمله في خياله لو عكسه بخياله هيعكسه في الحقيقة .
من الناس العبقرية في المعايرة ، دكتور ملتون اريكسون ، في يوم جاتله مريضة وقالتله "يادكتور بص انا روحت ل 23 دكتور غيرك ومحدش فيهم عرف مشكلتي ايه ولو انت معرفتهاش انا همشي" قالها طيب ، قرب منها شوية وقالها "انت من امتى بتلبس هدوم ستات وعامل نفسك ست ؟" ، المريض ساعتها اتصدم وقاله "انت عرفت ازاي" قاله من شوية كنت بتربت على كتفك ، لو كنت ست كانت المساحة بين كوعك وكتفك كانت هتبقى واسعة وده لان الستات ولوجود صدرهم في المكان ده فده بيخلي ايديهم بعيدة شوية ، اما انت فمعملتش كده وعملتها زي اي راجل عادي !
فتح عينك وابدأ شوف الناس ، لاني اخر مرة مشيت فيها في شارع القصر العيني لاقيت ضل واحد ماشي ورايا ، لو انت ملكش في المعايرة ممكن تقول "اوكي ممم واحد طويل ورفيع" انا قولت حاجات مشابهة لده ، بس زودت انه "اسمر وخاطب ومش قاهري " ، لو عايز بجد تفهم اازاي ده ممكن يحصل ، متاخدش دورات فراسة ، بس فتح عينك وخلي عقلك الباطن يقولك ، لانه عارف صدقني .
لو عايز تسجل نفسك في اول كورس للتنويم الايحائي وتتعرف على العلم الي غير حياة الملايين وتحب تعرف ازاي ممكن تستخدمه على نفسك والناس من حواليك علشان تخلي حياتك احسن بس ارسل رسالة على arabhd@maktoob.com
وفيها اسمك ورقمك وهيتم الاتصال بيك
نهاد رجب
اول مدرب عربي في فنون الاقناع والتاثير التنويم الضمني
مدرب ومعالج بالتنويم الايحائي
http://www.nihadragab.com
للاشتراك في جروب عيشها بدماغك
http://www.facebook.com/group.php?gid=70299372951
ليست هناك تعليقات:
إرسال تعليق