ازاى ممكن ترجع شريك حياتك

ازاى ممكن ترجع شريك حياتك

مبدئيا وبشكل شخصي ، انا مش مستريح للفكرة ديه وده لسببين ، اولا ان اول حب في حياتي وتجربة عيشتها اختارت فيها البنت انها تسبني وتديني (بومبة) على راي عادل ادهم وده لإني كنت (مزيت ومشحم) على رأي ميمي شكيب ، انا مقدرتش ارجعها تاني مع اني حاولت ، صحيح مكنتش اعرف الحركات الي هقولهالك دلوقتي بس عموما حاولت وفشلت وده ادى لتاني سبب الا وهو ان نص كتاب التاريخ اتكتب عن ناس عاشوا الحالة ديه وفشلوا فيها وابدعوا فتلاقي شاعر او عالم او قائد ، كان فيه واحدة في حياته طلعت عينه ونفضتله بعد ماكلفتته وانا مكنتش هكتب الي بكتبه لو مكنش ده حصل من البداية والله اعلم.

انا مش عارف ، سوري لو انا مهيس دلوقتي بس انا نايم الساعة 3 ونص وصاحي الساعة 8 الصبح ، وكان الجيش ظبطني على منبه داخلي فارض عليا انام 4 ساعات بس .

فرايي الشخصي ان احنا كتير اوي سواء كنا ولاد او كنتوا بنات والدنيا مش بتقف عند حد ، بس مع ذلك هقولك على كام طريقة ممكن تستخدمهم علشان تجمع الناس الي انت حبيتهم حواليك من تاني .

ايه رايك لو عرفت ازاي ممكن تخلي حبيبك الي هجرك يجري وراك ؟ ويستموت علشان ترجعله تاني؟ ده في حالة ان الموضوع متقفلش بشكل فيه قلة كرامة لحد .

"انا اسف"

مش زي مانت فاكر، فكرة الاسف معناها انك توصل للشخص ده ايحاء انك كنت عارف انك غلطان بعد مجادلات عقيمة ، وان ده مش هيحصل منك تاني، نفسيا الكلمة ديه هتخلي الشخص يراقبك علشان يتاكد انك مش هتكرر نفس الاخطاء ديه تاني ، ومعنى انه يراقبك فده كده بشكل ضمني بيستعد انه يرجعلك تاني . وطبعا مش هتقوله "انا اسف" في النهاية هتعرف الموضوع بيمشي ازاي

"انا فاهم"

اغلب الخناقات والمشاكل بين الاتنين بتبقى مبنية على سوء الفهم ، وحل ده انك تبدأ تفهم مع نفسك ايه الرسالة الي شريكك كان بيحاول يوصلهالك بطلباته المختلفة وازاي انت كنت بتفهمه غلط وتبدأ تقوله "انا فاهم انك انك بتعمل ده علشان كذا وكذا" . المهم تقعد بجد مع نفسك وتحاول تعيد اكتشافه وتفهمه بشكل حيادي تماما.

"انا هديك مساحة تبقى براحتك"

هو مطلبش منك مساحة ؟ هو طلب وقت ، الجملة ديه سحرية بسبب انها بتقلب الترابيزة على الشخص التاني الي سابك او قرر يسيبك ، وده لانك بتفهمه انك انت الي هتسيبه وكانه لاواعيا هيبدأ يفكر "ايه ده يعني انا هبقى لوحدي" مع انه هو الي طلب ده في البداية بس مكنش طالب مساحة هو كان طالب مدة زمنية ابدية ومع ذلك تغيير المصطلحات حبس الشخص في ركن مش هيعرف يتخلص منه وهيخليه يتسامح معاك لانه خايف انك تبعد عنه بالمساحة ديه الي انت هتسيبها جواه . وهتخلي الطرف التاني يحس انه عايزك تبقى موجود ومش عايزك تبعد .

واخيرا وليس بأخر : "اقطع كل الاتصال بينكم"

لو فعلا عايز الشخص ده يجيلك تاني ، اول مايحاول يبعد عنك خد انت نفس الخطوة وابعد ، تليفونات نص الليل ورسايل العتاب وكلام الاحباب بيخليه يتمسك اكتر بموقفه ، ابعد تماما واقطع كل اتصال بينكم ، ده هيرسله ايحاء "في داهية" ومحدش بيقبل ده على نفسه وزي مامشي هيجيلك تاني ، المهم انك تقطع كل اتصال وتخلي الناس تتكلم عنك كويس جدا وكان شيئا لم يكن .

ازاي ممكن تستخدم كل ده :

تصدقي ، لولا اللي حصل ده انا مكنتش اكتشفت حاجات سلبية كتير اوي عن نفسي ، ومع ان ده كان على حساب علاقتنا بس تعرفي ؟ محدش بيتعلم بسهولة انا مبسوط اني قدرت اشوف ده فيا بسببك واوعدك اني هديلك مساحة لوحدك براحتك ومش هضايقك تاني، لاني فاهم انك كان نفسك اعمل (كذا وكذا وكذا) في وقت (كذا) بس انا الي مخدتش بالي ومكنتش بفكر غير في نفسي وحقك الي بتعمليه وانا اوعدك اني مش هضايقك تاني بتليفونات .

ملحوظة للتاكيد : انا مش مدعم لفكرة ان حد يرجع للتاني او خطط تتعمل لده ، بس ديه معلومة حبيت اشارك بيها الناس ، ممكن تستخدمها لو حسيت بجد ان الشخص التاني يستحق ده وانك هتعمل ده علشان اسرة ومستقبل نضيف ليكم انتوا الاتنين .

نهاد رجب

http://www.nihadragab.com

"If you cling to what you have, you'll never get anything better. The best way to win back your ex is to let them go. It can be frightening to take that risk, but it's necessary to having a winning relationship."

المراجع : Ilona Benes