خد بالك دة نهاد رجب!

 

 

استنى بس لما اقول لحد اني "معالج بالتنويم الايحائي" – اغلبهم بيسكت شوية وفجأة يقولك "متبصليش في عيني" .

من فترة كنت بجيب حاجة من واحدة ست كبيرة تعرفنا من زمان ، قبليها بيوم كانت عنيا اليمين حمرا جدا ، لونها مش طبيعي وجربت معاها كذا دوا ومكنتش بفتحها وانا ماشي علشان محدش ياخد باله ، بس الشمال كانت سليمة ، روحت للست ديه وبشتري منها حاجات ، كلمة مني ، كلمة منها لاقيتها بتقولي "هو انت يابني بتشتغل ايه؟" ، سكت شوية وهمهمت وقولت في الاخر "انا .. انا ... انا معالج بالتنويم المغناطيسي" ، رجعت خطوة وقالتلي "يالهوي .. متبصليش في عيني" ، فابتسمت وشاورتلها على عيني الشمال وقولتلها "انتي عارفة ، العين ديه متخافيش منها .. وفجأة فتحت العين اليمين وقولتلها اما العين فخدي بالك اوي لما تشوفيها.." الست اتنفضت وغمضت عنيها "انا هقول لمامتككككككككك" ..

طبعا مع اننا كنا واخدين الموضوع هزار بس فعلا لما الاقي حد بيهزر بعرف انه بشكل ما هيصدق ، بالذات لما اقول لحد "انت كده هتخليني اعمل معاك الحركة رقم 17" ويقعدوا يتحايلوا عليا علشان يعرفوا ايه هيا ..

لما اتكلمت في التنويم الضمني – والتنويم الضمني هو شكل متقدم اوي من اشكال التنويم الايحائي – الناس بدأم ينتقدوني انا !

من يومين كتبت مقالة عن زرع الذكريات الوهمية بالتنويم الضمني ، وقولت تقنية ازاي ممكن تزرع في دماغ حد ذكرى وهمية من خلال تركيب لغوي معين ، واستخدمت نموذج كمثال ، ومش عايز اقولكم كمية التعليقات والهجوم عليا في الرسايل الي جاتلي والتليفونات لناس معرفش عرفوا رقمي منين ، بسبب ان التقنية ديه قالوا انها تضليل وغلط وحرام اني اقولها ، انا ساعتها سحبت المقالة واعتذرت عنها ، بس الغريب ان فكرة ذرع ذكرى وهمية بالشكل الي عرضته ، ميجيش 3% من الي ممكن التنويم الضمني يعمله ، لان تقنيات التنويم الضمني النفسية في الاقناع والتاثير ملهاش حصر ، واوبن سورس ، يعني مفيش منهج يلمها وحاجات بتستخدم ضدنا من كل مكان ، طيب انا تخيلت اني مدربش التنويم الضمني تاني لان مثلا تقنية زي تكسير الشخصية او التحفيز بالمنافسة ممكن يكفروني بسببهم مثلا !

بس كذا حد دعم بشكل جميل ومتحضر ، انا مش بقدم حاجة علشان تستخدمها بشكل غير لائق ، انا بقولك ايه الي ممكن يحصل معاك وفعلا ناس قالوا ان الكلام ده كانوا بيتعرضولوا وميعرفوش يتصرفوا فيه ، عارف لما حد يحبسك في افكارك بجملة واحدة ؟ عارف لما تحس ان حد بيعاملك زي الصلصال وبيشكلك بدماغه وانت او وانتي مش عارفين تعملوا معاه حاجة ؟

او انك تكون كاره حد ونفسك تقتله لانه غلط فيك وفجأة يكلمك كلمتين تنسى بيهم اي حاجة بينكم ؟ ده بيحصل بالتنويم الضمني وتقنياته طيب لما تعرف التقنيات وتعرف مين بيحاول ينصب عليك ومين بيحاول يخدعك احسن ولا لما متعرفش عنهم حاجة وتكتشف ان الناس بتستخدمها عليك انت شخصيا؟

في عجالة ، مثلا تأثير كلمة "ليه" ، انت عارف اني لو سالتك "ليه ..... كذا كذا بيحصل....؟ " وانت جاوبت باجابة اولها "علشان" – وده الطبيعي انه يحصل – عقلك الباطن حرفيا قبل الاقتراح بتاعي ، يعني مثلا لو قولتلك "انا عندي سؤال مهم جدا ، نفسي اعرف ليه يامحمد الواحد بيحتاج ياخد وقت يفكر في حاجة قصاده وفي الاخر بيرجع يشتريها من نفس المكان ؟" – وانا مثلا بحاول ابيعلك عربية فرضا - روحت انت جيت قولتلي "علشان الواحد لازم يانهاد يبقى ذكي وفاهم وكمان علشان بيحب يعرف اكتر ويشوف تاني واول حاجة شافها اكيد شدته وكان ليهاتاثير اكبر من اي حاجة تانية" ... انت شايف الرد ده ؟ انا عايزك بس تجرب تستخدم النموذج ده مع حد ، تقول لواحد صاحبك مثلا "نفسي افهم علميا ليه الواحد بيحب ياكل بعد مايروح السينما؟ هل ده علشان تاثير الصور ولا علشان ..." هتلاقيه بدأ يجاوبك ببساطة لان محدش هيقولك "مش عارف" ده حتى لو قالك "مش عارف" فهو كده قبل الاقتراح بتاعك المضمن بشكل "اننا هناكل بعد مانخرج من السينما"..

اولا في دوراتي مبقبلش حد اقل من 18 سنة ، مينفعش بجد انا معرفش هو ممكن يعمل بالحاجات ديه ايه ، وكان بيجيلي ناس لو شوفت صور دورة سبتمبر مثلا هتلاقي اصغر واحد فيها فوق ال 25 ! وبيراسلني محاميين ومدربين ومسوقين وابهات وامهات باخبار عن تاثير التقنيات ديه عليهم وعلى الناس الي حواليهم ..

بس المشكلة ورجوعا للنقطة الاساسية ، نهاد الا وهو انا بدأ الناس تحب انها تتعرف على العلم ده اكتر بس خايفين مني انا ;)

انا مبستخدمش التنويم الضمني في حياتي الا في القليل اوي لما ازهق من حد ، وكتير منا قابلوا نوعيات ناس مينفعش معاها المجادلات ، ساعتها بستخدم تقنية او اتنين تسلل او اصرار او ثلاثية تنويمية او افتراضات اي حاجة بتيجي في دماغي ساعتها الشخص بيسكت وبيهدى وبيسمع كلامي ، لكن انا والي يعرفني ، انا بتعصب وبتنرفز وبتضايق وبتخنق ، مع انها مشاعر سلبية بس انا بحبها ، بحبها لانها بتحسسني بشخصيتي وبحياة انا بعيشها ، مش عايز ابقى مكنة بتتحرك بخطوات وخطط مدروسة وحركات زي كده ..

لما تلاقي مثلا في اعلان بيقولك "ليه الجسم بيحتاج 8 اكواب من مياة نستلة يوميا؟" " اولا علشان كذا وكذا " او اعلان يبدأ ب "ماهو الشىء الذي كلما لمسته صاح " ، اعلانات كتير اوي بيلعبوا بيها في عقولنا وحضرتك وحضرتي الي بندفع ، انا دوري اني اعرض التقنيات وطريقة استخدامها ، هتستخدمها ازاي انا مش عارف ، الدين نفسه ممكن حد يستخدمه علشان يبني أمه وحد تاني ممكن يستخدمه علشان يقتل الناس ..

فالعدو الحقيقي مش انا ، العدو موجود برة بيحاول يعمل كل حاجة علشان يستفيد منك ، لو انت واحد منهم فاتقي الله ولو انت زي وزي ناس كتير اوي ، فانت عارف انت ممكن تروح فين.
وبدل ماتنتقدني انا وتكرهني انا ، شوف انا بقدملك ايه ، لان ديه تقنيات عالمية صدقني مش هتلاقي حد بيتكلم عنها ولو دخلت جوجل ودورت عن التنويم الضمني هتعرف ليه ، مش انا المهم هنا ، الي بقوله هو الاهم ، انا كتبت فيه كتير علمه للناس وعرفهم عليه ...


نصيحة ليك ، خد بالك ، فيه حاجات بتحصل حواليك وانت بتشوفها وانت مش شايفها ، بتأثر عليك وبتخليك بعد كده لما تشوف بنت بتتعاكس مثلا متتحركش او تسمع الادان متتهزش او تنافق او تعمل حاجات وانت معندكش اي مانع ! انا مش مدرب تنمية بشرية انا معالج ومدرب بالتنويم الايحائي وتطبيقات التنويم الضمني المتقدمة . انا كده انا نهاد ;)

www.nihadragab.com