سحر العقل..والاقناع النفسى
رايح شغلي للمعادي ، اتصادف اني عديت من قدام موقف العربي وكان فيه خناقة بين اتنين سواقين ماسكين في بعض ، وعادة بعض الناس انك تلاقيهم بيعملوا دوارية حوالين الخناقة ويتفرجوا وهما في ترانس (تنويم) ومتنحين وكانهم مستنيين يعرفوا مين الي هيكسب ، والاغرب انك تلاقيهم مش عاجبهم الحال وعمالين ينددوا ويعترضوا وزعلانين اوي بس حرفيا محدش بيتدخل وانا مش بطل وممكن مبصش خالص لاني عارف ان فيه حاجة دايما بتحصل كل مرة .. معاهم او مع غيرهم ... الحاجة ديه هيا قانون السلطة العليا والي بيقول ان في موقف زي ده لو اتدخل بينهم واحد مهما كان سنه وحاول يفرق بينهم هيسمعوا كلامه ... !
مش مصدق؟ طيب اختار خناقة وروح فرق فيها بين اتنين ماسكين بعض ضرب ، وزعق فيهم واشتم فيهم واضرب واحد منهم حتى ، هتحس كانه ماصدق انك تعمل كده ، وتلاقيهم بيحكموك وتلاقيهم بيعتذرولك في بعض الاوقات وتلاقيهم باسوا راس بعض ... وانت مين ؟ اين كان ! حتى لو كنت زيي حد معدي ، بس دايما الواحد لما يبقى في تصادم مع حد تاني بيستنى واحد تالت يفرق بينهم ويصالح بينهم ، واول مابيلاقوه بيرجعوله هما الاتنين واي كلمة هيقولها هيصدقوها حتى لو كان غريب عنهم ولا عمرهم شافوه قبل كده
شكل تاني من اشكال اتباع السلطة العليا ، ان حد يكون بيتكلم مع واحد تاني ، وبيحاول يقنعه بحاجة (غالبا حصلت معاك وانت وقعت فيها) واول مايلاقي الشخص ده بيجادله بيدور (تاني) على حد تالت علشان يوجهله كلامه قدام الشخص الاولاني ويقوله فيما معناه "يعني انا بقوله اعمل كذا كذا علشان مصلحتك وهو مش راضي ، ينفع كده يعني؟" الغريب ان اغلب الوقت هتلاقي الشخص الجديد ده متضامن جدا معاه وموافق على كلامه والاغرب انك هتلاقي ان الشخص الاولاني لما يعرف كده هيبدأ يوافق هو كمان !
وديه تقنية اقناع نفسية ناس كتير بتستخدمها بالفطرة بس تاثيرها صعب يفشل ، وده لانها مبنية على تقنية الموافقة الجماعية في التنويم الضمني والي معناها ان الواحد مستعد تماما انه يخضع لتاثير الجماعة الي هو عايش معاهم حتى لو الجماعة دول مجموعة اطفال ... المهم انك بتقلدهم وبتتبع (السلطة العليا) .
لما تكون ماشي في الشارع وانت ابن ناس اوي ومش بتحب ترمي حاجة في الشارع وبقالك نص ساعة في ايدك كيس ولا علبة وعايز ترميها ، ومش لاقي ولا سلة ممكن ترمي فيه (يبقى انت اكيد في مصر) بس الغريب نفسيا الي بيحصل انك بترمي الي في ايدك في اي حتة لو لاقيت الاتي
انك معدي واكتشفت ان فيه ناس تانية رمت في نفس المكان ده ، يعني متكوم زبالة هتلاقي نفسك في اغلب الاحيان اتوماتيك بترمي معاهم (مع انه ضد قيمك وافكارك ومبادئك ) بس انت فعلا بتعمل كده لمجرد ان فيه ناس تانية عملته .
فالسلطة العليا معناها اننا بنتبع بالفطر الشخص الي ممكن ميكونش موجود بس تاثيره واضح على ناس تانية وسواء اعترف بده او لسة فاحنا فعلا بنتبع ..
ودلوقتي هقولك على حاجة تنفذها مع الناس تديلك سلطة عليا عليهم او على الناس القريبة منك ..
فرضا انت خاطب او متجوز ، بعض الناس بتفكر غلط لما تلاقي واحد زعل من مراته او خطيبته ومكلمهاش اسبوع واستناها ترجعله هيا وهيا الي تتأسف علشان يصالحها ... طيب ، الي هو مش فاهمه انها كده سلطتها العليا اقوى منه ومع الوقت هيترجم المووضوع في عقلها انها هيا الي بمزاجها تتخانق معاه وهيا الي تختار الوقت الي ترجعله فيه .. اما لو انت الي صالحتها في الوقت الي تحدده فده معناه نفسيا بعد كده ان الامور هيا الي في ايدك وانك انت المتحكم في كل حاجة .. فابدا صالح من دلوقتي لان المسامحة قوة ...
المواقف المذكورة هنا مش تقنيات لو عايز تجربها جربها بحكمة (يعني مش اي خناقة تجرب فيها ومترميش حاجة في الشارع علشان تجرب الناس هتعمل ايه )
:)))))
المرة الجاية : مقالة : اتريق قبل محد يتريق عليك
نهاد رجب
اول مدرب عربي لفن الاقناع والتاثير النفسي بالتنويم الضمني
http://www.nihadragab.com/
ليست هناك تعليقات:
إرسال تعليق