احترامى للتنمية البشرية
مبدئيا : حبيبي واستاذي ومدربي الاول دكتور ابرهيم الفقي ، بحبك في الله وربنا يشفيك يارب .. النوتة ديه لا تقلل من قيمتك عندي ولا بحاول اوصل اي حاجة ضدك ، واتمنى اشوفك دايما بخير . واشوف كل المدربين الصغيرين والكبار بخير وكل الي عنده رسالة حقيقية وعايز يوصلها وينفع بيها الناس ..
لما دكتور الفقي جيه القاهرة وبدأ برامجه الخاصة ، وجاب معاه علوم من برة زي التنويم الايحائي والبرمجة اللغوية العصبية ، حصل ربط بين التنمية البشرية وعلوم تانية كتير قايمة بذاتها بس دخلت تحت مسمى التنمية البشرية لمجرد ان د الفقي بيدربها .
لما سالت يعني ايه التنمية البشرية ، وجهت السؤال لمدرب تنمية بشرية فقالي ان التنمية البشرية هي علوم تهدف الى خدمة الانسان والرقي بيه ، علوم زي ايه ؟ قالي الطاقة البشرية والتنويم الايحائي والبرمجة اللغوية العصبية .. قولتله طيب هو الطب النفسي تنمية بشرية ؟ قالي لا طبعا ده حاجة لوحده وكلام فارغ قولتله الطب النفسي كلام فارغ قالي اه طبعا !
اصل الدكتور من دول بيجيب الناس بياخد فلوسهم ويعالجهم في سنين ، وكل ده طبعا لمصلحته اما بالتنويم الايحائي او البرمجة العصبية فاي حاجة نفسية ممكن تتعالج في عشر دقايق ده غير طبعا انه مبيسمعش المرضى وبيديهم ادوية لكن احنا لا .. ابتسمت وقربت منه وسالته انت عالجت اجروفوبيا في 10 دقايق ؟ قالي يعني ايه اجروفوبيا ؟ قولتله طيب عالجت اكتئاب في 10 دقايق؟ قالي بص انا مش معالج بس بتحصل ! .
خليني اقولكم حاجة ، الطب النفسي مجال لازم يحترم بكل المقاييس وبقوانينه وبعلاجاته وطرقه المختلفة ، ولا انا ولا اي حد ليه الحق انه يقلل من شأنه ، وهو مش تنمية بشرية لاي سبب ، التنويم الايحائي كعلم ظهر قبل الطب النفسي بسنين بس كأداة علاجية مستخدمه فده بقاله كذا الف سنة ، فالطب النفسي مش تنمية بشرية والتنويم الايحائي مش تنمية بشرية ومش طب نفسي ، هو اداة من ادوات الطبيب النفسي وفرويد اتكلم عنه واستخدمه وملتون اريكسون وجيمس برايد ، وناس كتير من الدكاترة النفسيين .
البرمجة العصبية ، عبارة عن تقنيات لغوية بتخلي الشخص يكره او يحب يبعد او يقرب ، وهي مزيج من علوم تانية ، بس ولان د الفقي دربها في مصر فبدأ الناس يدخلوها في سياق التنمية البشرية ، لكن حتى مؤسسيها محطوهاش في الاطار ده ابدا ..
دلوقتي يعني ايه تنمية بشرية ؟ معرفش :D
بجد مش عارف بس خلينا نألف ونقول انها شوية كلام حلو بتحفز الشخص علشان ينجح ويحقق اهدافه وكل ده في اطار محاضرة من ساعة او اتنين المحاضر فيها بيحلف انه يقدر يخلي الشخص ناجح او يبقى سعيد مثلا ، علشان المتدرب يخرج بيفكر في حاجة من اتنين ، اولهم ازاي يبقى هو كمان مدرب تنمية بشرية ، ثانيا ازاي كل الي هو سمعه مبيتحققش وبيصدمه اكتر مابينفعه .
يعني كنت في محاضرة لمدرب واعد فقال دلوقتي هقولك خطوات عملية تخليك واثق من نفسك .. اولا : كن سعيدا !!! يارجل؟ بجد ؟ ابقى سعيد ؟ مش مصدق نفسي .. ثانيا : حب نفسك !! لا انت كده اوفر ..
ابقى سعيد واحب نفسي ، يانهار تصدق مكنتش اعرف ، اصل انا هدوس على ذرار هبقى مبسوط وفجأة الاقي اني بحب نفسي وببوسها .
اما ليه اخترت مجال التنويم الايحائي والضمني فده لإني ببساطة عملت بيهم حاجة وشوفت تأثيرهم ، لما الاقي واحد يغمض عينه ويفتحها علشان يقولي انا بقيت احسن ! ونفضل طول عمرنا صحاب ، لما الاقي الناس بتتغير فعلا وبتستفيد ، لما الاقي قدامي نتايج وحاجات بشوفها بعيني ، ساعتها انا آمنت بقوة التنويم وده الي انا درسته ، لاني وانا عندي 18 سنة خدت كورس معالج بالتنويم الايحائي وانا عندي 19 عملت كتاب التنويم الايحائي ، اول ماكملت العشرين اطلقت الشبكة العربية للتنمية البشرية و في ال 21 عملت شركة الشبكة العربية لحلول الانترنت واشتغلت كمصمم مواقع بجانب عشقي ودراستي للتنويم ، وفي ال 22 دخلت الجيش وال 23 بقيت اول مدرب عربي في فنون الاقناع والتاثير بالتنويم الضمني .
بيتر كلايتون قال ، انك ممكن يبقى عندك الهدف والحماس وكل حاجة بس مش عارف تحققه ، ده لانك مش عارف تتعامل مع الناس ، الناس هما اهم عنصر في حياتك حتى اهم من الهدف بتاعك ، اعرف هما مين فين وازاي تقدر توصلهم ساعتها هدفك بقى في جيبك علشان كده انا اخترت حاجة تقربني اكتر من الناس وتخليني اقدر اتفاعل واتعامل معاهم .
لما الاقي ان المسجد الاقصى بيقع ومحدش بيتحرك يبقى محدش يقولي تنمية بشرية ، لما الاقي ان مروة الشربيني مصرية اتقتلت علشان حجابها محدش يقولي تنمية بشرية ، لما الاقي اننا بنتشتم وبنتهان برة بلدنا علشان ماتش كورة يبقى محدش يقولي تنمية بشرية ، لما الاقي اننا بنتشتم وبنتهان جوة برضه محدش يقولي تنمية بشرية ، انا كل الي اعرفه ان الواحد هيرتقي بدينه مش بمنهج لناس ملحدين ، لو فعلا عايز تنجح اقرى واسمع وافهم السلف كانوا عايشين ازاي ، وبلاها تنمية بشرية .
نهاد رجب
انا نهاد رجب مدرب ومعالج التنويم الايحائي ومدرب فنون الاقناع والتاثير بالتنويم الضمني مليش علاقة بالتنمية البشرية وبطلتها للاسباب الي كتبتها ، انا مش مصلح اجتماعي ولا واعظ او مثل أعلى، لو هتعرف عني حاجة هي اني دايما بطبيعتي وبقول الي انا شايفه ، احب الناس تحبني بس انا مش بحب اترسم ولا امثل ، ده بروفايلي يعني فيه شخصيتي فالي هتقراه عني مني هو انا فمن فضلك اقبلني زي مانا
اول مدرب عربي في فنون الاقناع والتاثير التنويم الضمني
مدرب ومعالج بالتنويم الايحائي
http://www.nihadragab.com
للاشتراك في جروب عيشها بدماغك
http://www.facebook.com/group.php?gid=70299372951
ليست هناك تعليقات:
إرسال تعليق