اسرار الولاد-Boys Code 2

اسرار الولاد- boyes code 2

امبارح كنت مع بنت جميلة وكنت انا في منتهى الرقي والادب والاخلاق العالية واقولها حضرتك وتقولي حضرتك ، يا استاذة ، يا استاذ ، والحياة بيننا جميلة انا الولد المؤدب وهيا البنت النقية الهادية زي القمر . كنا في اتوبيس من مدينة نصر لرمسيس ، وانا عادتي للي يعرفوني اني مبحطش المحفظة في جيبي لما اقعد ، لازم اشيلها ، خرجنا من الاتوبيس مشينا شوية في رمسيس والدنيا متربية عندي اوي وخلاص قربت اجيب حصان ابيض وترجن ترجن ، لحد ما بشوف المحفظة ملقيتهاش في جيبي الوراني ، فجأة وقفت وقولت "اح** المحفظة" !

البنت ساعتها بصيتلي وقالتلي استاذ نهاد !!! قولتلها استاذ ميييين ، ولسة هندب طلعتلي المحفظة من شنطتها وقالتلي (في ثانية وهي خايفة) اهي انا خفت تقع فقولت اشيلها ، ساعتها سكت وابتسمت وقولتلها تسلمي حضرتك قالتلي ولا يهمك حضرتك . (وهكذا)

 
من يومين كتبت مقالة اسرار الولاد ، وفوجئت باكبر عدد تعليقات معارضة شوفته في حياتي من اول ماعرفت الفيس بوك ، كنت فيها بتكلم عن بعض الحاجات الي ممكن تشد ولد لبنت ، وباختصار كانوا ،اولا انك تهتمي بنفسك وتنمي من نفسك وهو الي هيجيلك ، ثانيا المنافسة لانه لما يعرف ان فيه اكتر من واحد بيبصلك كمثل اعلى وحد صعب الحصول عليه هيتمناكي لنفسه ، ثالثا الادب والدين لانك لو سمحتيله ياخد منك حاجة دلوقتي هيبرطع ومش هيرضى بالاقل.

وكل ده كنت بقوله عن ولد انتي مش عارفاه ، يعني انتي لما تعملي ده لنفسك هيجيلك اين كان اسمه .. النهاردة هكمل كلامي عن اسرار الولاد علشان تعرفي الولد دماغه بتمشي ازاي لما يبقى في حضرة بنت جميلة زيك وانتي مراته او خطيبته .

مبدئيا المثل الي بيقول "صوابعك مش زي بعضها" ساعات بيبقى مثل فاشل ، لان الولاد في العلاقات زي بعضها ، وبلاش نردد مصطلحات زي "الراجل الشرقي" و "الراجل الشمالي والجنوبي ومتوازي المستطيلات" علشان منبقاش حافظين ومش فاهمين.
الإيماءات :

لما نشتري حاجة جديدة بنبقى مبسوطين اوي ، بس بنبقى مبسوطين اكتر لما ناخد مع الحاجة ديه حاجة هدية زيادة ولو بسيطة ، وده الي بيخلينا نرتبط بالشخص او بالمكان الي اشترينا منه الشىء ده والغريب اننا لما بنتكلم عن الحاجة ديه بنهتم جدا اننا نذكر الاضافات المجانية الي خدناها ، وديه حاجة بتحصل لكل الناس ، الإيماءات الي بتكلم عنها وهي حاجات بسيطة بنعملها من وقت للتاني بس ليها معنى "الاهتمام" ، يعني مثلا لما تعطس وبنت تناول الولد منديل وتقوله سلامتك ، احسن من بنت تديله الكيس كله وتقوله خده ليك .

الصيني مش وحش (بشروط) :

في مرة اتكلمت عن الاختراع الصيني الجديد وقولت اننا المفروض منخافش من وجوده بينا وفكرة ان الاختراع ده هيخلي البنت تقدر تعمل الي هيا عايزاه ديه فكرة انا ضدها تماما ، لان الموضوع مش حيواني للدرجاتي ، والاختراع مش هو الي هيخلي البنت تعربد ، فيه عوامل تانية اهم واحسن واقوى زي الدين والاخلاق والقيم ، فالصيني مش خطر علينا بالذات ان فرضا فيه واحدة غلطت ، وحصل الي حصل وحبت تتوب ، وربنا كرمها بواحد ، واستخدمت الغشاء ، فهل ده غلط ولا ده من باب الستر ؟

الغريب اني لما اقول كده الاقي معارضين كتير يقولولي انت قصدك انها تضحك على جوزها ؟ والمفروض يبقى فيه صراحة وتقوله !

انا موافق الناس دول في حالة واحدة ، لو اضمن نفسي ، مبدئيا انا مليش علاقة بماضي البنت الي رضيت اخلاقها وادبها ، سواء كانت غلطت او لا ديه حاجة بينا وبين ربنا الي هيحاسبها ، اما انا فهبقى مسئول عنها في اليوم الي هتجوزها فيه لحد مانموت ، فمفيش داعي اني اغلس عليها واقعد ادور وراها علشان اكتشف انها كانت فاجرة ، واحدة ربنا سترها وتاب عليها ليه انا أعمل نفسي اله واحاسبها من اول وجديد ؟

واحدة اتصلت بشيخ في قناة ما وقالتله ياشيخ ، انا بحب جوزي اوي ، وهو بيحبني وراجل طيب وجميل والحقيقة انا قبل ماعرفه كنت بمشي مش كويس ، وحاسة اني عايزه اقوله علشان ابقى صريحة معاه ، وقفها الشيخ وقالها متقوليلوش ، وهو ماله ؟ ربنا تاب عليكي ، انتي رجعتي لعقلك وتوبتي ليه تقوليله ؟ ده لو شيخ ممكن يتفتن .

مين فينا ضامن نفسه ؟ مين فينا يقدر يستحمل انه يسمع بودانه من مراته انها نامت مع واحد تاني وفض الختم ببلاش ، ويكمل معاها بعد كده من غير مايشك في كل حاجة هتعملها ؟ مين فين بلا خطيئة ؟ "من كان بلا خطيئة فليلقها بحجر" ، انا نفسي كل بنات الدنيا تلتزم وترجع لدينها ، بس في نفس الوقت لو بنت غلطت فحقها انها تتوب ، ومش من حق اي حد انه يحاسبها على ماضيها او يحاول يعرفه .
وديه النقطة التانية ، مفيش ولد عايز يعرف تاريخك الجنسي ، ولو سالك وقولتيله هتحصل حاجة من اتنين ، لإيما هيسيبك او لإيما هيكمل معاكي علشان ياخد نصيبه من التورته . انتي كيان وهو كيان مختلف ، مهما كان ماضيكي اسود ، متحكيهوش لحد واعقدي العزم لنسيانه وابدئي من جديد مع حد هيقدرك بجد فبلاش تجرحيه وتقوليله حاجة هو مش هيقبلها كراجل ، سواء كان شرقي او لا بس مفيش انسان سوي ممكن يعدي حاجة زي كده من غير مايحاكمك عليها وفي الاخر برضه هيسيبك.

وانا بالآية الي بتقول ان الطيبون للطيبات والخبيثون للخبيثات ، فانا هبقى كويس واكيد ربنا هيختارلي بنت كويسة ، همشي غلط ربنا هيختارلي بنت على شاكلتي وممكن ابقى ماشي غلط واتجوز واحدة كويسة جدا بس ده لحاجة هي اني في يوم هتعدل وابقى احسن ، محدش عارف مكتوبله ايه ، بس خليك مؤمن بكده وخليكي مؤمنة بكده لان الطيبون للطيبات

اتقي الله : كلاكيت تاني مرة

الولد ممكن ينحرف ويحب مليون واحدة ، بس لما يتجوز هيختار بنت يرضى اخلاقها ويتطمن عليها تبقى مراته .

الموضوع بسيط جدا ، انا ممكن اقنعك ان الي بعمله معاكي ده بيقربنا من بعض اكتر ، وان ده هيخلي علاقتنا اقوى ، بس في الاخر هتيجي في دماغي فكرة "ممممم ديه بتعرف تبوس خير شكلها عملت كده قبل كده" او "زي ماعملت كده معايا هتعمل مع غيري اكتر" .

فمن البداية متسمحيش بأي حاجة شهوانية انها تحصل بينكم ولو حتى مسكة ايد (مجازا) ، لانك في الاخر هتكتشفي انك كنتي عروسة بزمبلك بيلعب بيكي وبيسمع منك موسيقى وكلام حلو وبيبقى مبسوط لما يدور الزمبلك واول مابيحتاجك بيدور الزمبلك تاني (بمزاجه) وكل مرة يستنى منك نفس التصرفات ، لحد ما بطاريتك تخلص ساعتها هيسيبك ويدور على حد حقيقي ، انتي ساعتها هتكتشفي انك كنتي لعبة صنع في الصين ، فنصيحتي ليكي كأخ ، متسمحيش من البداية وصدقيني ده هيشده ليكي اكتر . ولو مجاش فيكش يولع ، احمدي ربنا ان نصيبك مكنش مع واحد زيه .

اولا اهتمي بالحاجات البسيطة الي مش هتكلفك حاجة او تعب مع جوزك او خطيبك زي مكالمة تليفون او رسالة من وقت للتاني او حاجة بسيطة صدقيني هنحبها جدا على رأي نزار القباني ، وخدي بالك ان الي حصل في حياتك حصل وخلص متحكيش الا الحاجات الي انتي فخورة بيها وعايزاه يتعلم منها ، وفي الاخر متسمحيلوش بحاجة انتي مترضيش نفسك عليها لانك لو رضيتي ان حد يحبك كده وعلشان ده اول اولوياته ، فصدقيني هتتعبي اوي لحد ما البطارية تخلص.
نهاد رجب

اول مدرب عربي في فنون الاقناع والتاثير التنويم الضمني
مدرب ومعالج بالتنويم الايحائي

للاشتراك في جروب عيشها بدماغك http://www.nihadragab.com http://www.facebook.com/group.php?gid=70299372951