بالعقل كدة.....الاسلام

بالعقل كدة........الاسلام

"أقسم بالله لأنا قاري الرسالة ديه لحد الآخر ، اديك اقسمت ، اقرى بقى والا هتصوم تلات ايام وييجي العو يطلع عين اهلك ـ "

كتير بتقابلنا رسايل من نوعية الجملة الي فاتت ، وبنستغرب جدا منها ولما بنكمل الرسالة بنكتشف انها اشياء مش ممكن انسان عاقل يصدقها ومع ذلك في ناس بتصدقها جدا وبتؤمن بيها وبتحكيها في المناسبات ، في خلال المقالة ديه هستعرض كذا حاجة قابلتني وانتوا تقرروا ..

النبي ومن نب النبي نبي ، امبارح الشيخ أحمد حامل مفاتيح الكعبة شاف النبي ، في منام (ده على اساس انه ممكن يكون شافه في بيتهم) ، ووصاه وصية للمسلمين من مشارق الارض ومغاربها وقاله ان القيامة قربت والناس في غفلة وان فيه قريب اوي نجمة هتظهر في السما (سبحان الله.. نجمة تخيلوا !! ياترى النجوم ديه شكلها ايه لما تبقى في السما !!!) وقاله يا احمد وصيتك بتنشر الرسالة ديه بين المسلمين والي هينشرها هيكسب شفاعتي والرزق الوفير والخير الكثير (شوفتوا الفجر) والي هيتجاهلها "فإنه يحرم من رحمة الله" ... وفي نفس الرسالة الشيخ احمد بيقول انه حلم برضه (بسم الله ماشاء الله عليه) حلم يوم الاتنين – اكيد علشان اجازة الحلاقين – ان الي ينشرها 30 مرة – من الاخر يبعتها ل 30 واد وبنت على الليستة بتاعته في الفيس بوك – ربنا بيرزقه وعرف نفس الشيخ ان فيه واحد نشرها تاني يوم كسب 30 الف ريال(فرق عملة)، وواحد تاني كسب 96 الف !! وواحد تاني كذبها ومنشرهاش ، ابنه تاني يوم مات – غالبا علشان الواد كان بيلعب في الكهربا واد سيس مش متربي ..

مبدئيا حامل مفاتيح الكعبة اسمه عبد العزيز ، الشيخ عبد العزيز آل شيبه ومسموش أحمد ، وزي ماقال الشيخ القرضاوي " وطالما سألنا الناس في المدينة وفي الحجاز عن هذا المدعو الشيخ أحمد وعن وظيفته، فلم نعثر له على أثر ولم نسمع عنه خبرًا، ولم يعرف في وقت من الأوقات هذا الشيخ أحمد ولا رآه الناس في المدينة في يوم من الأيام ولم يسمعوا هناك هذا الخبر، ولكن جاء من يشيع في بلاد المسلمين مثل هذه الوصايا المحزنة ."

ورسالة تانية جامدة جدا وصلتني قريب ، واحد بيحلف بالطلاق ان بنته كانت عيانة وبتموت وحلمت بالسيدة عائشة جات وحطيت ايديها على جبهة بنته ودعيتلها والبنت خفت وجابت السيدة عائشة (خرقة) وكتبت عليها أمانه تبعتها ل 30 واحد تعرفها وانت يجيلك الخير الكثير واشوفك امير وعندك بعير (ديه من عندي) ، ولما بعتها بنته اتجوزت وفيه واحد قال ايه الكلام الفاضي ده ومبعتهاش صحي تاني يوم لقى نفسه عيل صغير وعاملها على روحه (اشياء من هذا القبيل)

عندنا كل يوم جمعة بيجيلنا شيخ من الارياف بيخطب بينا ، وانا ساكن في شارع القصر العيني في مكان اغلب الي فيه مبيصلوش اساسا ، بس علشان يوم جمعة فبنتجمع وبنسمع الخطبة ، من الحاجات الي شدتني في خطبته جملة "مين قال ان الرسول بشر ؟؟؟؟ احنا هنكفر !!!!!! الرسول نووووووووووووور ، من وجه الله ، ربنا خد من نوره والقى نوره فإذا هو محمد ، الله اكبر الله اكبر ، يجماعة الرسول نور ، ده كان بيقعد مع اصحابه وفجأة وشه ينور من كتر النور ولما كان بيروح من مكان لمكان ، كان بيطير في الهوا ، اااااه امال ايه " الشيخ الجميل التمستله العذر وده لأن فيه ناس بتحب النبي اوي .. عايز تعرفهم ؟ هتلاقي اغلبهم بيقول "حضرة النبي" فمن كتر الحب بدأ الناس تنشر احاديث على لسان النبي محصلتش ظنا منه انه بكده بيحبب عبيد الله في الرسول .. والرسول صلى الله عليه وسلم "من كذب علي متعمدا فليتبوأ مقعده من النار" ، اما حديث ان الرسول قبضة نور فده حديث موضوع في العصر العباسي (موضوع غير ضعيف ، موضوع يعني حد جيه راح الفه والناس بدأت تتناقله واعتقدت انه حديث)

جم الشيعة ودول حكايتهم حكاية ، بدأ الموضوع معاهم ببدعة صغيرة اوي ، ومن البدعة بدأت تكبر لحد ما بقى من الشيعة خمسين فرقة كل فرقة بتتكلم شوية مع نفسها ، منهم الروافض الي بيسبوا الصحابة وأم المسلمين السيدة عائشة وده اتكتب فيه كتب ، فبدأ الشيعة يألفوا دين جديد ، شعاره ، نحن لها نحن لها (لها مين بقى مش موضوعنا) يكتبوا احاديث ، عادي جدا ، يضعفوا احاديث ، عادي جدا ، يشككوا في نبوة سيدنا محمد وان النبوة كانت في طريقها لسيدنا علي بس الي نزل بالرسالة تاه او اتكعبل على رأيهم (اصلهم مكنوش مسفلتين) ، عادي جدا ، المشكلة الاكبر ان فيه ناس مننا وصلتلهم بعض الافكار الشيعية وبدأم يتبنوها ، اشهرها تشكيك بعض الناس في نزاهة بعض الصحابة بسبب اقاويل قروها في كتب ومراجع شيعية او حتى اسلامية سنية من غير دراسة وفهم موضوعي للي حصل ويبدأ ينبثق بعض من الي بيسموا نفسهم مفكرين اسلاميين ، يضعفوا احاديث للبخاري ويطلع واحد يقولك ياجماعة الحديث الي في البخاري ده ضعيف ، اصل انا صحيت النهاردة ولاقيت هاتف جالي وبيقولي لازم تقول للناس ياحمادة مفيش حد نضيف غيرك يوعي الناس ، ويبدأ يألف كتاب ويبقى ليه تابعين وناس مدعمين وشوية شوية نلاقي نفسنا بنتجر ناحية الفكر الشيعي وبندافع عنه وبنتهم السنة بالتخلف العقلي علشان كده جيبتلكم النهاردة بعض من مبادىء الشيعة بالنسبة للي عايز يعني يتعرف اكتر عليهم ..

خليني اسالك سؤال شيعي بحت ، ازاي تعرف ان البطيخة موالية لآل البيت ولا ناصبية ؟ اكيد مش عارف ، ماهو بسبب انك مش بتقرى حضرتك فاكيد مش عارف ، بص بقى الخميني بيقولك ايه :

حدثنا حمزة بن محمد العلوي ، عن أحمد بن محمد الهمداني ، عن المنذر بن محمد ، عن الحسين بن محمد ، عن سليمان بن جعفر ، عن الرضا ، عن أبيه ، عن جده ، عن أبي جده ، أن أمير المؤمنين أخذ بطيخة ليأكلها ، فوجدها مرة فرمى بها ، فقال : بعداً وسحقاً !! وفقيل له : يا أمير المؤمنين ، وما هذه البطيخة ؟ فقال : قال رسول الله صلى الله عليه وسلم : إن الله تبارك وتعالى أخذ عقد مودتنا على كل حيوان ونبت ، فما قبل الميثاق كان عذباً طيباً ، وما لم يقبل الميثاق كان ملحاً زعاقاً .

فلو طعمها حلو تبقى من آل البيت ولو طعمها وحش تبقى بطيخة كافرة ، اه امال ايه ... طيب بلاش ديه ، تعرف انك لو عطست بطريقة معينة يخرج من مناخيرك طائر يدعيلك ليوم القيامة ؟ برضه مش مصدقني ؟ خد ديه

عن أبي عبد الله قال "من عطس ثم وضع يده على قصبة أنفه ثم قال: الحمد لله رب العالمين الحمد لله حمدا كثيرا كما هو أهله وصلى الله على محمد النبي الأمي وآله وسلم: خرج من منخره الأيسر طائر أصغر من الجراد وأكبر من الذباب حتى يسير تحت العرش يستغفر الله له إلى يوم القيامة" (الكافي 2/481

اما المهدى المنتظر فالشيعة بتقول انه لما هيخرج هيخرج عريان وهيظهر في عين الشمس ، متستغربش ماهو الدنيا كده كده هتبقى حر ! ده طبيعي جدا ، عايزه يخرجلك بإيه ؟ بنايك ولا اديداس؟

سبحان الله ، افتراءات على الله تضحك ، اما بخصوص الجنس عند الشيعة كان نفسي اقتبس بعض الحاجات من الي قريتها ومت على نفسي من الضحك بس احتمال الفيس بوك يقفلي الاكاونت بتاعي بسبب الاباحة ..

فتلاقي واحد عاملك فيلم كله جنسي وطبعا لازم يتريق على الشيوخ ،فيجيبلك ارهابيين بيخطبوا في الجامع واحد منهم بيقول كل بدعة ضلالة وكل ضلالة في النار ويمسكوه مسخرة ، سبحان الله ، يجماعة هو الي قال "كل بدعة ضلالة وكل ضلالة في النار" انتوا هتعرفوا احسن منه ؟ لما الاقي واحد بيصلي جمبي واحنا في التشهد الاقيه رافع صباع ايديه اليمين والشمال ، وفي اخر التشهد لما يبص يمين بيحرك الصوابع لجهة اليمين ولما يبص شمال بيحركهم شمال وكانه بيندب ، او ييجي حد يسلم عليك بعد الصلاة وتيجي تقوله حضرتك ديه بدعة ، يقولك ياعمي مين الحمار الي قالك كده ، اساله "حضرتك البينة على من ادعى ، حضرتك سمعت عن الرسول انه كان بيعمل كده ؟" يقولك "مانا اهلى كلهم كده غير فهمني هه فهمني فيها ايه يعني" ، تقوله "حضرتك احسن من الرسول الي ربنا بعثه علشان يتم بيه نعمته ؟" يقولك "بطلوا تخلف بقى" ، سبحان الله ، ناس بتألف وناس بتخترع ولما حد يحاول يصلحلها تأخذه العزة بالإثم ويبدأ الشيطان يبررله تصرفاته ويتمسك بالي بيعمله حتى لو كان غلط لمجرد ان ابوه واجداده كانوا بيعملوا زييه ..

واحدة تطلع تقول ان الرسول صلى الله عليه وسلم في حديث ليه طلب من اصحابه يشاركوه في عائشة جنسيا وبتدافع جدا عن الحق ده ومتمسكة بالحديث ده جدا ، ولما المذيع قالها ده حديث ضعيف (يعني غلط مكذوب عن النبي) ، قالتله "ايوة ايوة ماهو لما حاجة تبقى لحق الست تقولوا ضعيف والراجل لا" ، يعني حضرتك شايفة ان من حق الست ان الرجالة يشاركوا جوزها فيها؟ ده الي انتي بتدافعي عنه ؟ المشكلة انها سعودية واسمها زينب حفني ، كاتبة كتاب ملامح وهربانة في لندن دلوقتي ، وواحدة تقولك ، اتحدى اي حد يجيبلي دليل من القرآن ان الحجاب من الشرع ، سبحان الله ، ديه تايهة ديه ولا ايه ؟؟؟؟

وفي النهاية صحيح انا اتريقت على الاخطاء الي بشوفها واتريقت على كلام الشيعة ومحاولات هدمهم لسنة محمد صلى الله عليه وسلم ، بس خليني اعترف انهم على الاقل قدروا ينتشروا بيننا ، بقى فيه ناس بتدافع عنهم وبتقف في صفهم حتى من غير مايعرفوا نوع عقائدهم ايه ، تحت مسمى الحرية والديمقراطية ، في كل حاجة ، في تيسير الدين (شيعة) في تيسير الجنس (شيعة) في تيسير اللواط ولعب الرجل بعورة الرجل (شيعة) وتلاقي شخص اسمه حسن نصر الله يطلع يقولك سوف ننتصي عيا اسيئايي ونييهم نصي كييم ، ويقعد في خطبه يشتم في اصل السنة والدين ويتهم الصحابة بالاثم والفجور ويتهم امهات المسلمين بالضلال ، اعاذنا الله ، اتمنى ان عقيدتنا تنتشر والي مطمني آية في القرآن ربنا بيقول فيها "يريدون ان يطفئوا نور الله بافواههم ويابى الله الا ان يتم نوره ولو كره الكافرون" اللهم امين اللهم امين بس علشان ده يحصل اتمنى ان كل واحد فينا بجد ينتصر لدين الله وينصر نبيه واقولهالكم تاني ، اتعلم علشان ترد ولو انت متعلمتش فعلى الاقل متخطلش بناس بيستهزئوا بعقيدتك ، انا صحيح مش شيخ ، وامي بتتحايل عليا علشان اصلي ، ومش متخصص ، اقرى المقالة ديه تاني هتلاقيني بتكلم بمنطق واحد بيحلل الي بيسمعه ويقدر يعرف فين الاختلاف ومين صح ومين غلط ، واتمنى انك متبصلهاش بإطار ديني بحت وتشوف كلامي من منظور حيادي مختلف )))

والبقية تأتي وفي النهاية احب اختم بقصة حصلت لواحد صاحبي ، كان صغير في تانية ابتدائي تقريبا لما الميس طلبت منهم الواجب ، فبتقولهم يولاد لازم تعملوا الواجب علشان تروحوا الجنة ، وكان الواجب كتير فراح وقف وقالها ميس ميس ، نعم يااحمد ، يميس الرسول صلى الله عليه وسلم قال ... صلى الله عليه وسلم ياحبيبي ، قال ياميس "لا تفعلوا والواجب وانتم مش عايزين" ضحكت الميس وقالت قصدك "وانتم مكرهون يا احمد" ، قالها ايوة ياميس ، قالت صدق رسول الله صلى الله عليه وسلم ، وبدأت تفسر الحديث !!!

ملحوظة "احمد هو الي الف الحديث"

نهاد رجب

مدرب فن الاقناع والتأثير بالتنويم الضمني

http://www.nihadragab.com