كون المرء حرا لا يعنى شيئا , اما ان يصير حرا فهذا هو الانجاز الحقيقى

كون المرء حرا لا يعنى شيئا, اما ان يصير حرا فهذا هو الانجاز الحقيقى

من يومين بعد محاضرة "قناعات اكثر قوة" الي عملتها في العجوزة جات متدربة سلمت عليا وعبرتلي عن امتنانها وقالتلي "على فكرة كنت عايزة اسألك ، تقول ايه في المحجبات والتخلف الي هما فيه ؟" ابتسمت ابتسامة عريضة حسيت كاني في برنامج لهالة سرحان وسالتها "تخلف ازاي يعني"؟ قالتلي ان ده كبت للحرية ومظهر من مظاهر القناعات السلبية الي بتخلي البنت في الاخر ضحية وبتظهرها ضعيفة واساسا اساسا يعني اساسا مفيش في الدين حاجة تنص ان الحجاب شرعي !، قولت في نفسي طب وانا مالي انا ... هو انا لابسة !؟ بس قولتلها "بصي الحقيقة انا مش شيخ لكن من ناحية تخلف وكبت للحرية فده الي كان ليا فيه تعليق صغير" ، قالتلي "ياريت" سالتها "موافقاني ان الحرية هي القدرة على الاختيار؟" قالتلي "ايوة طبعا" قولتلها "انتي اتولدتي بالحجاب؟" "لا" "طب انتي مش محجبة ليه غير ان ده من مظاهر التخلف البين زي مابتقولي؟" ، "علشان عايزة اعيش سني " ، سالتها "زي الناس" ؟ ، "ايوة" ، قولتلها "اوكي سوري بس انتي مش حرة" قالتلي "لا انا فهماك بس..." قاطعتها وقولتلها ، "انتي معملتيش اي حاجة باختيارك ، البنت المنتقبة ممكن تكون حرة اكتر منك لانها اختارت انها تفرض على المجتمع اسلوبها وايمانها بالي هي فكراه صح ، اتولدت بشعرها ومحدش قالها اتحجبي واتحجبت واختارت انها تبدل كل ده وتنتقب بسبب ايمانها بفكرة وبتوجه كامل لان محدش بيفرض عليها انها تنتقب بس هي حبت وامنت واقتنعت واطاعت ونفذت في النهاية اما انتي اختارتي انك تخضعي للمجتمع واسلوبه اختارتي انك تمشي مع التيار ، الفرق بينك وبينها ان في الوقت الي انتي مشيتي فيه مع التيار هي اختارت لنفسها اتجاه وسكة ورفضت ان حد يقيمها او حد يفرض عليها شكل معين ، رفضت انها تمشي مع التيار وتبقى زي الناس واتمسكت بمبدأ ، ممكن اسالك ، لو حد بيفرض نفسه واسلوبه على المجتمع ، واختار لنفسه اتجاه ورفض ان حد يقيمه واختار سكة كل الناس معرضاها يبقى حر ولا مش حر ؟ " قالتلي "طب مانا كده انا كمان حرة لاني مقتنعة بالي بعمله ومرضتش امشي مع التيار" ابتسمت ابتسامة داخلية وقولت لنفسي "دلوقتي بتحاولي تدافعي عن نفسه هه ؟" بس قولتلها "كل انسان حر بطريقته ، المهم حريته متنتهكش حرية حد غيره ، والاهم انه يحافظ عليها والاهم اكتر انه بعد كل ده مايكتشفتش في النهاية انه كان عبد لافكاره ورغباته وافكار ورغبات ناس تانية غيره ، ببساطة لانه مرضاش انه يدور على الحقيقة ورضي بالاسهل ، مش مهم شكل الحرية ، المهم يكون ليها اساس ومبدا ووجهة نظر ، لو حد سالك انتي مش محجبة ليه ؟ مينفعش تجاوبي وتقولي "اصل انا حرة او عشان اعيش سني" ، اراهن انك لو سالتي اي بنت منتقبة انتي منتقبة ليه ؟ هتقولك على اسباب قوية وثابته مش مجرد انها حفظاها او سمعتها قبل كده بس اكيد اسباب هي مؤمنة بيها ومتاكدة انها صحيحة .


فيختا – واحد معرفوش واسمه غريب اساسا- قال "كون المرء حرا لا يعني شيئا اما ان يصير حرا فهذا هو الانجاز الحقيقي"


مينفعش تمشي في الشارع وتقول انااااااااااااا حررررررررر ، محدش هصديقك بس انك تدوق الذل وتتعب وتتهان وتتاخد منك حريتك وبعد كده ترجعلك ، فانت ساعتها هتكون حر بجد ، لانك في الوقت ده هتكون عارف قيمة كل ثانية في حياتك اكتر من اي حد تاني .

نهاد رجب