العادة السرية

العادة السرية

انا مش هتكلم عن الحرمانية ، لاني مش شيخ ، طبعا كل مسلم داعية بس انا مش متخصص ، المقالة للشباب من الجنسين ، لانك هتعرف مع نهاية المقالة انها بتلمس كل واحد فينا ، الي بيمارس العادة السرية والي حتى ميعرفش عنها حاجة ، اغلب الولاد هيفهموا يعني ايه عادة سرية بالنسبة للبنات الي مش فاهمينها فهي عملية بتتمارس بشكل شخصي علشان الشخص يحصل منها على متعة مؤقتة او لحظية ، في خلالها بيبدأ الشخص يتخيل صور او ذكريات قديمة بتساعده انه يستمتع اكتر لحد مايوصل لمرحلة الانتهاء او علميا –القذف – ساعتها بيحصل حالة اسمها الهدوء ..


لو مكنتش قفلت المقالة فانا بحييك على كده لاني زي ماقولتلك انا راجل مش متخصص بس كل الفكرة اني كاني عندي خاطر او ترجمة مختلفة للموضوع ده ..


سرعة القذف مرتبطة ارتباط وثيق بالعادة السرية ، بس بعيدا عن المشكلة الجنسية للعادة السرية ، خلينا نحاول نعرف ازاي ممكن يبقى ليها بعد تاني ، ولحد دلوقتي انا متكلمتش في حرمانية ، انا مليش دعوة ، بس تعالى نترجمها بشكل مختلف .....
فرضا ، سين من الناس بيمارسها بشكل مستمر ، فزي ماقولنا هو بيبدأ يتخيل صورة ، تبدأ عملية الاحتكاك وفي نص العملية بيوصل للذروة وفي الاخر بيحصل القذف وبعد القذف بيبقى فيه هدوء تام الشخص بيقرف من نفسه بعدها... ازاي ده ممكن يأثر على حياته ؟

اتعاملت زمان مع حالة عمري ما كنت فهمتها قبل النهاردة ، حد بيقولي ان حالته غريبة جدا ، عنده 26 سنة وكل مايدخل في تجربة مش بتستمر الا لفترة صغيرة وبعد كده بتنتهي وبيبدأ يدور على حد تاني وحب جديد ، حد مجتهد اوي بس اول مايوصل لحاجة مرضية ونجاح مرضي بيبدأ ينزل عنه ويبدأ يكسل وتحصل حالة هدوء شديدة هو مش فاهم سببها ايه ، بس بيبدأ تجيله فكرة جديدة يشتغل عليها او علاقة جديدة يحاول ويجتهد على اد مايقدر انه يوصلها واول مايوصل انه يتربط فعلا ويدخل العلاقة يلاقي نفسه بينسحب تاني وبيقرف من كل حاجة مرتبطة .. فترة تعدي ويدخل في علاقة تانية او شغل مختلف وهكذا .. فحياته باختصار بقت حياة مش متزنة ، مذبذبة ، سريعة وملهاش معنى لانها مش بتكمل فيها حاجة فمعندوش ذكريات يقدر يحكي عنها .. لان كل الصور المرتبطة بالتجربة بتختفي اول ما التجربة بتخلص ...


انا مش بطل ، انا جربت معاه التنويم كذا مرة ولما كان بينجح مكنش بيستمر اكتر من شهر مثلا وبعد كده بيرجع تاني زي ماكان ، ساعتها كان كل الي في دماغي ان الشخص عنده مشكلة في التركيز والتحمس وكنت بستخدم معاه التنويم علشان اخليه يحتفظ بحالة التركيز والتحمس الي هو فيها واقويها جواه ، مكنتش اعرف ان ده كان ممكن يإذيه اكتر ببساطة لاني كنت بخليه يركز اكتر على النقطة الي بيوصلها لكن مكنتش بخليه يكمل ، هو مشكلته انه يكمل ..


رجوعا لفكرة سرعة القذف فهي مرتبطة بالعادة السرية نفسها بس خلينا نفهم فكرة السرعة بشكل مختلف من منظور تاني هتلاقي انك مش قادر تستمتع بحاجة لفترة طويلة او حتى تحزن لمدة كافية بسبب ان كل حاجة بتعملها بسرعة واي حاجة جميلة تدخل حياتك هتبقى مبسوط بسببها لفترة قصيرة وفجأة هتبقى بالنسبة لك عادي واهتمامك ليها هيختفي .. عارف ده معناه ايه ؟ انك هتتجرد من كونك انسان بيحس وبيتعايش وبيفكر وبيندمج ويتآلف وبيقرر ... هتبقى مجرد الة بتشتغل بالطاقة ، لفترة صغيرة وبعد كده هتدور على نوع تاني لطاقة مختلفة تعيش عليها ..


العادة السرية بتوصل الشخص انه يتجرد من المعنى الحقيقي لحياته ، بتخليه مش فاهم هو مين او امتى او ازاي وليه ، بتخليه ماشي بيتخبط بين فكرة والتانية ، علاقة والتانية وفي الاخر بتخليه فاكر ان الناس فيها مشكلة لكن المشكلة فيه هو شخصيا ، المشكلة انه اتعود انه يعمل كل حاجة بسرعة ويحصل على استمتاعه من خلال عمليه جنسية تافهة مبتستمرش اكتر من دقيقة او اتنين وممكن اقل وبعد كده بيكتشف انه عمل حاجة غلط وحرام حتى المتعة بتختفي في ثانية وبينسى هو كان مستمتع بايه ؟ الحاجة الوحيدة الي بتستمر معاه هو احساس النقص او الضعف الي هو بيحس بيه بعد ماينتهى من العملية ديه ..

مش لازم تبقى العادة السرية بشكلها المعروف او المفهوم ، ممكن تبقى اي حاجة انت بتعملها مع نفسك ، وليها نفس الطابع ، حاجة سريعة ، مؤقتة وفي الخفاء وبتقلق ان حد يشوفك وانت بتمارسها ، ممكن تبقى بوسة سريعة لحد من غير ما حد ياخد باله او لمسة او اين كان شكلها .. فهي سريعة ، وبتتعود عليها ولو قريت النظرية الجزء التالت هتعرف ازاي اي حاجة بتعملها بتاثر على سلوك انت شخصيا وطريقة تفكيرك ، وبتاثر على ردود افعالك ، العادة السرية لو كانت مش محرمة وانا عارف اني مش شيخ بس لو كنت اقدر كنت حرمتها بس على الاقل انا محرمها على نفسي ، لاني مش مستعد اقايض حياتي كلها وشخصيتي كبني آدم في مقابل عملية جنسية مبتستمرش اكتر من دقيقتين ، او اين كان شكل العادة الي بعملها في السر اني اشرب سجاير مثلا او مخدرات او خمرة او اغتاب حد او انم في حد اين كان شكل العادة فانا مش مستعد اخسر نفسي علشان متعة لحظية هتختفي في ثانية واعيش حياتي كلها في مراية..


انا مش عارف ايه نوع العادة السرية الي بتمارسها ؟ بس صدقني لو انت شايف انك بتكسل بسرعة او انك مش ثابت و مش متزن ومش عارف تركز فدور في الي بتعمله هتلاقي ان فيه عادة صغيرة اوي بتعملها بشكل مستمر مع نفسك بقيت بشكل رئيسي السبب في الحياة الي انت ممكن تكون عايشها وانت مش فاهم حاجة .. ابدأ اعرف ايه عادتك السرية هل هي جنسية بحتة ولا سلوك معين مختلف ؟ قرر انك توقفها حالا مهما كانت وجرب تعيش حياتك ، وتحس بالاختلاف الي ممكن يحصل ..


واخيرا ، اي شىء سري هو الي متقدرش تقوله للناس ، فمتعملش اي حاجة متقدرش تحكي عنها بثقة وبجرأة
نهاد رجب