كوميديا -ج1
في بحث علمي اجراه بعض العلماء على بعض القرود ، وفيه جابوا قفص ودخلوا فيه 4 قرود ، القفص في منتصفه على طول كان فيه سلة موز وتحتها فيه سلم ، طبعا والطبيعي ان القرود اول مادخلت وشافت الموز واحد منهم هوب طلع على السلم وقفش في الموز في اللحظة ديه كان العلماء بيرشوا باقي القرود التلاتة بالمية ، نزل صاحبنا من فوق ، طلع حد غيره وهنا رش العلماء التلاتة الباقيين بالمياة ، وكل مرة يحاول قرد فيها انه يطلع العلماء يرشوا التلاتة الباقيين ، لحد مابطلت القرود انها تطلع – خايفة من المياة .
خرجوا قرد قديم ودخلوا قرد جديد – ميعرفش اي حاجة عن المية – اول مادخل شاف الموز صرخ واتنطط وهوب ناط على السلم علشان يطلع ، مسك فيه التلات الباقيين وقعدوا يضربوا فيه علشان – خايفيين من المياة
كل مايحاول يطلع يمسكوه يضربوه لحد مابطل يطلع خالص ، شوية وخرجوا قرد قديم تاني ودخلوا واحد جديد ، هوب نط صاحبنا على السلم ، قفشه التلاتة الباقيين وقعدوا يضربوا فيه ، بما فيهم مين ؟ القرد الي ميعرفش حاجة عن المية ، لحد مابطل يطلع وهكذا ، لحد ماخرج كل الجيل القديم من القرود الي عاصروا المياة وبقى الي موجود القرود الي ميعرفوش حاجة عنها ومع ذلك اكتشف العلماء ان القرود الجداد اتميزوا بانهم مبيحاولوش يطلعوا يجيبوا الموز واي حد جديد كان بيدخل كانوا بيمسكوه يضربوه !! ليه ؟ علشان ..... ولا حاجة ، لمجرد ان الي سبقوهم كانوا بيعملوا كده ..
القرآن ذكر بعض الناس الي بتتعامل بمبدأ القرود تحت مسمى ( هذا ماكان عليه الأباء والأولون ) ، فالكوميديا هنا ان فيه ناس عايشة بمبدأ القرود ، بفكر القرود وبدماغ القرود ، تلاقي حد بيدافع عن شخصية او موقف او اتجاه معين ، ولما تساله ليه ؟ يقولك اي حاجة غير انه فاهم حاجة ، مجرد ان تم توجيهه من ابوه وابوه من جده وجده من ابوه وهكذا ، وطبعا طريقة التفكير ديه مرفوضة عندنا وفي عقيدتنا بس خليني ابدأ الجزء الاول من الكوميديا ببعض المواقف الي بتبين اد ايه الانسان ممكن يبقى موجه لمجرد ان الناس بتعمل كده ..
بس قبل مابدأ ، خليني اقولكم عن مبدأ التوافق الجماعي ، ببساطة معناه ان الانسان بيتصرف في البيئة زي الناس الي حواليه وبيعتقد في الي هما بيعتقدوا فيه ، لحد مايخرج من البيئة ويبدأ يصادف افكار مختلفة ، فانت لو في بيئة دكاترة هتطلع دكتور ولو فيه بيئة مجرمين هتطلع حرامي لو كلهم زملكاويين هتطلع اهلاوي وهكذا ، والاغرب من كده انك ممكن تلاقي ملايين واقفين قصاد مجرم زي هتلر وبيشاوروله ومستعدين يقتلوا اي حد علشانه ، اطفال وشباب بنات وشيوخ ، كلهم في نفس المكان وكلهم حركاتهم واحدة ، طريقتهم واحدة ، افكارهم واحدة وتوجهاتهم معروفة ..
في التنويم الضمني ووسائل الاقناع بنستخدم العملية النفسية ديه في التاثير لما مثلا تقول لحد ، ان كل الناس بتستعمل برسيل ، فبتبدأ تدخله في سياق ان الناس بتعمل ده وانت كمان لازم تعمل زيهم ، ومع اختلاف الشخصيات ممكن تغير الجملة وتقول مثلا ان كل الناس المميزين بتستعمل برسيل ، او كل الستات الشاطرة بتستعمل زيت عباد الشمس ، وهكذا ..
من الناس الي قابلتهم من نوعية الاباء والاولون ، كانت بنت ، بنت مصرية عايشة وبتدرس في استرالية وكان فيه بيننا مشاعر وبوادر علاقة ، البنت ديه محجبة ، بس الغريب انها محجبة في مصر بس بس هناك هي شايلة الحجاب !!
انا استغربت ولما سالتها قالتلي اصل الواحدة بتلبس الحجاب في مصر علشان متتعاكسش ، بس في استراليا محدش بياخد باله والبنت لما تلبس حجاب الناس بتبصلها اكتر ، بغض النظر عن صحة بعض كلامها بس سالتها "مممم يعني هو حرام في مصر وحلال في استراليا ؟"
زي ولد شوفته ، ولد بريء طفل مدارس :D
لاقيته بيشتم واحد صاحبه ، فك*** تيييت بس كلها بالانجليزي ، فروحت قفشته قولتله يبني انت ازاي تجيب سيرة ام صاحبك وتقوله تبا لك ؟ قالي لا انا قولتها بالانجليزي ! .. يا سلام !!! يعني بالانجليزي حلال وبالعربي حرام ؟
او بنت بجد صديقة وبقدرها وعاملها تاج ، بتكره الوهابيين ، وده طبعا شىء طبيعي جدا نسبة لوسائل الاعلام وكل واحد يطلع يشتم فيهم شوية ، بغض النظر هما صح ولا غلط ، بس البنت كانت في السعودية وحصلها تجارب كتيرة كرهت الوهابيين بسببها وخدت عنهم فكرة وحشة ، والبنت مش محجبة ، ودكتورة وحد بيفكر اوي يعني ، فقولتلها طيب ايه رايك لو اقنعتك بالحركة الوهابية ، قالتلي لا مش هقتنع ولو حصل ايه دول ناس متحجرين ومتطرفين وارهابيين ، قولتلها طيب انتي محجبة ولا لا؟ قالتلي لا مش محجبة ومش هتحجب ، قولتلها طيب ممكن اسالك سؤال ؟ يعني واحد وهابي بيتكلم في الدين وهو مبتسم وبيحاول انه يوصلك معلومة بشكل جميل وانتي بتقولي لا انا مش هقتنع وانا مش هتحجب ، يبقى بالله عليكي مين فيكم المتحجر والمتطرف؟
او واحد يطلع في التلفزيون زي سيد القمئي ويتكلم في الدين ويفتي وينكر ويسب ويلعن ، ولو حد شافه وهو بيتكلم اقسم بالله تحس انه بطلجي بلطجي يعني ، ولما حد يتكلم بالدين معاه ويبتسمله يقول اااااه شيوخ الفضائيات المتخلفين، الي بيفتوا ، امال انت بتعمل ايه ؟ يعني لانت متخصص ولا انت فاهم وبتسب الصحابة وبتنكر اساسيات الدين وكمان بنكرمك وكمان بتقول على الي بيحاولوا يوصلولك بالموعظة الحسنة انهم متطرفين ؟ شوفتوا بعض القرود ياجماعة بيتصرفوا ازاي؟
فيه ناس بمزاجها وناس غصب عنها ، فيه ناس بتبقى عارفة بس عزتها بتمنعها من انها تغير رايها ، فيه قانون في الاقناع بيقولك ان الشخص لو التزم قدام الناس بجملة قالها بصوت عالي الناس سمعتها مش ممكن يغيرها حتى لو وقفت على دماغك ، يعني لو جيت قولتلك انا بكره فلان وبعاديه ، مهما حاولت تقنعني مش ممكن اقتنع ، مش لانك مش عارف تقنعني ده لاني التزمت ، وفيه من ده نماذج كتير منها عم النبي صلى الله عليه وسلم ومنها كتير من الكفار الي رفضوا دخول الدين لمجرد ان اسمهم هيتشكك فيه ، وبنستخدم القانون ده في الاقناع من خلال انك لما تقابل حد اديله هدية قلم مثلا يكتب بيه ويكون غالي ومكتوب عليه اسم الشركة بتاعتك ، الشخص مدام قبل الهدية هيلاقي نفسه مضطر انه يستجيب ليك او يوجه ولائه لشركتك لمجرد انه بيكتب بقلم مكتوب عليه اسمك ...
والنماذج كتير اوي ، لناس متمسكين بتوجه تفكيري لمجرد ان ده الي هما اتربوا عليه ، وان شاء الله في المقالات الجاية هذكرلكم نماذج تحفة كاملة لناس بدات معاهم من مرحلة الاعتقاد المعاكس لحد ماخلتهم يغيروا اعتقادهم واقنعتهم بالعكس تماما بس في خلال المرحلة ديه هتعرفوا ازاي الناس ممكن فعلا تتمسك بفكرة ملهاش وجود لمجرد ان ده الي لاقوا عليه الاباء والاولون ...
لو عايز تعرف معلومات اكتر عن كورس هندسة الاقناع والتاثير بالتنويم الضمني ، ابعت رسالة على arabhd@maktoob.com وهنراسلك
نهاد رجب
اول مدرب عربي في هندسة الاقناع والتاثير بالتنويم الضمني
مؤسس الشبكة العربية للتنمية البشرية http://www.nihadragab.com
ليست هناك تعليقات:
إرسال تعليق