قانون التأثير المعاكس- تنويم ضمنى

قانون التأثير المعاكس- تنويم ضمنى

حاول على اد ماتقدر انك متشوفش الحروف المكتوبة ، حاول ، انت مش مضطر انك تشوفهم بس حاول وانا عارف انك لو حاولت مش هتقدر وكل ماهتعافر وتحاول هتفشل وتشوفهم وفي النهاية هتقرى كل كلمة وانت مستعد تماما ليها ، ولان مفيش كلمة مبتتقريش فده بيخلي متعتك بالقراية تكبر جواك اكتر واكتر ..

اول مابنتعلم نمشي ، بنتلخبط كتير اوي وبنقع وبنقوم وبنقع وبنقوم وبنقع وبنقوم تاني ، ولما بنقوم بنمشي اكتر واكتر وبنبدأ نمد وشوية شوية بنجري وشوية شوية بننط وشوية شوية بننسى اننا في يوم كنا بنتعلم ازاي نمشي .. كبرنا شوية وحاولنا نربط رباط الجزمة ، خدناها واحدة واحدة كان كابوس حياتنا ازاي ممكن تربط الرباط او انهي فردة بتتلبس فين ، ومع الوقت اتعودت انك تربط وتفك من غير ماتفكر ، نفس الموضوع لما تتعلم سواقة العربية ، في البداية بتركز على كل حاجة في نفس الوقت ، ومع الوقت والتعود بتسوق وانت نايم او بتتكلم في الموبايل او حاطط ايدك على الشباك وبتتفرج على الدنيا من حواليك وبتنسى ان في يوم من الايام كنت بتحاول تتعلم السواقة ..

لو عايز تعرف الفرق بين العقل الواعي واللاواعي ، فببساطة هو ان العقل الواعي بيتعلم وبيغلط وبيحلل واللاواعي بينفذ من غير غلطة، اي مهارة جديدة بتبقى واعية مننا بتتطلب تركيز ، ادراك ، انتباه ليها ، وده بيخلينا نغلط ونتعب علشان نتعلمها واقل تمرين بيخلي المهارة تبقى حاجة بنعملها من غير مانفكر ، تبقى (لاواعية) .. فانت بتنقل المهارة من مرحلة الوعي (التعلم) لمرحلة اللاوعي (التنفيذ من غير اخطاء) ..

قانون التأثير المعاكس ببساطة معناه انك لو خليت حد يعمل حاجة بتحصل بشكل لاواعي بس قولتله يعملها بشكل واعي ، بيتلخبط ، وكل مايحاول انه يعملها بوعي منه بيتلخبط وبيفشل ، والحاجات الي بتتعمل بلاوعي حاجات زي "الشم ، التذوق ، حركة الدم في الجسم ، دقات القلب مثلا" ، فلو انا طلبت منك مثلا متشمش ريحة الاكل الي انا باكله واحنا قاعدين مع بعض في مكان واحد ، واصريت انك تحاول ، الطبيعي انك هتفشل لان محدش يقدر يتحكم هو عايز يشم ايه وايه لا ، فغصب عنك هتشم وساعتها هتفشل ولما تفشل هتبقى مستعد اكتر لاقتراحاتي الي هاتيجي بعد كده لان فيه قناعة اتبنت جواك انك متقدرش تقاومني ... مثلا لو قولتلك متفكرش في قطة سودا ، انت عارف القطة السودا طبعا بس متفكرش فيها ، الطبيعي انك انك هتفكر فيها ، لمجرد اني ذكرتها والتفكير مش حاجة ممكن تتحكم فيها بقرارات ، ديه عملية بتحصل ولما تحصل مش هتعرف توقفها ..

طيب ازاي ممكن تستخدم القانون ده في الاقناع ؟ في التنويم الضمني انت بتحتاج تخلي الشخص يقاومك علشان يفشل ولما يفشل بيسيب نفسه علشان تختار مكانه وبيبدأ ينقاد لاتجاهاتك .. والمعادلة بتاعة القانون بتتكون من خطوتين:

اولا : دور على شىء لاواعي واطلب الشخص يعمله بشكل واعي

ثانيا : حط الاقتراح بتاعك في حالة الفشل

تعالى نجربها ، لو فرضنا انت قاعد مع حد ومش راضي ياكل لانه مش جعان مثلا وانت عايز تقنعه انه ياكل كشري فرضا ، ممكن تتعامل معاه ازاي؟ تعالى نجرب الجملة ديه :

انا عارف انك مش حاسس لسة انك جعان بس حاول بس حاول انك متفكرش انك متشمش ريحة الكشري الجامدة ديه حاول بس دلوقتي هتتعب ومش هتقدر تقاوم رغبتك في انك تدوق شوية منه ...

او تعالوا نكبر الموضوع شوية ، لو قولنا مثلا بتبيع لحد عربية ..

انا عارف انك عايز عربية كذا وكذا وفيها كذا وكذا وكذا ، والعربية الي قدامك ديه ممكن فعلا متكونش فكرت فيها لسة بس خليني اقولك انك لو حاولت وفكرت انك متشوفهاش او انك تحاول انك متفكرش فيها هتلاقيها دايما قدامك في خيالك لانك عارف انها انسب حاجة ليك ولولادك...

تخيل مثلا بتكلم حد رغاي وبيتكلم كتير والموضوع فلت منه وبقى يتكلم كتير اوي ، اسهل حاجة علشان توقفه ممكن تقوله "من غير مقاطعتك ، انا بس عايز اقولك انك بتتكلم كويس جدا حاول تكمل على كده على اد ماتقدر " وبصله واسكت استناه يكمل ، بسهولة هتلاقيه اتلخبط ، لان في اللحظة ديه بدأ يسال نفسه ، انا بتكلم كويس ازاي ؟ هو انا كنت بقول ايه ؟ طب بقولها ازاي ؟ طب ازاي احاول احافظ على الطريقة ديه ؟ في خلال ما الاسئلة ديه بتدور في عقله هو بيحاول يتدخل في عملية بتحصل بشكل لاواعي بطريقة واعية فبيبدأ يتهته او ينتهز اول فرصة علشان يسكت ويخليك تحتفظ بالفكرة ديه عنه لانه هيخاف يغلط ساعتها وكل ماهيفكر في انه ممكن يغلط هيتهته تاني ، والتهتها ديه معناها ان العقل الواعي بيتدخل في تسلسل كلامي خارج من العقل اللاواعي ..

في خلال الدورة فن الاقناع والتاثير بالتنويم الضمني ، هتتعلم تقنيات عالمية مجزأة تخليك تقدر تستخدم لغتك بشكل تأثيري عالي جدا من خلاله تقدر ببساطة تعيد برمجة عقل الشخص الي قدامك بجملتين او تلاتة ..

حاول انك تنسى التقنية ديه هتكتشف انها بتحصل معاك انت شخصيا ، علشان كده هتبدأ تفكر بشكل جدي انك تعرف اكتر عن التنويم الضمني علشان تبقى في صلة اقوى بينك وبين مهاراتك اللغوية وعقول الناس .. وده هيحصل ان شاء الله لو ده الي انت عايزه.... انك تسجل معانا سهل جدا ، بس ابعت رسالة على Arabhd@maktoob.com واكتب في العنوان "دورة فن الاقناع والتاثير بالتنويم الضمني لشهر سبتمبر" واكتب اسمك ورقم تليفونك وهنتصل بيك ان شاء الله قبلها بفترة علشان ناكد عليك تواصلك معانا ..

نهاد رجب

مدرب تنويم ضمني

http://www.nihadragab.com

خطوات للاغواء الضمنى- اختى خدى بالك

خطوات للإغواء الضمني – أختي خدي بالك

كل بنت عندها مشاعر ، مهما ظهر منها قوة وثبات فمن جوة في انوثة بتنهار وبتطالب بحقها في الحب والعاطفة ، في نفس اللحظة الي بتدافع فيها عن قيمها ومبادئها فيه نار جواها مستنية الي يطفيها .

مرة شوفت بالصدفة حوار مع مغنى من المغنيين ، بيعترض بشدة على حرمانية الصور والتماثيل في الاسلام ، ركز على التماثيل وهاجم الي نقلوا الكلام ده ووصفهم بالتخلف ، وقال الكلام ده كان من الف سنة ان الناس تعبد اصنام لكن دلوقتي العالم اتغير والدنيا اتطورت ومفيش حاجة زي ديه ممكن تحصل ، والي يضحك ان نفس الشخص ده اعترف انه كان بيشرب خمرة ، ومش جديد ان حد يفتي يعني ، بس المشكلة هنا ان المذيعة كانت متضامنة معاه جدا وتقدر تشوف ده من تعبيرات وشهها المقرفة عارف لما تتقرف من حاجة فتقوم باصص بقرف كده ، هيا بدات توحي بحركات عنيها وبوقها ومناخيرها كلهم مع بعض ان الناس الي بيقولوا كده دول متخلفين اوي مع انها لو بصت في المراية ساعتها بشكلها ده هتكتشف ان محدش متخلف غيرها ولو هو سجل صوته وشاف نفسه بعد اللقاء مش هيغني تاني اساسا ، ومن هنا جاتلي فكرة مهمة جدا ، الفكرة ان الموضوع مش في الاصنام او التماثيل ، الموضوع ان الفطرة مبتتغيرش ، لكن المبادىء مكتسبة ، واي حاجة مكتسبة بيحصلها انتكاس في وقت من الاوقات ، فمهما كان عقلك متفتح وقوي هتكتشف انك ممكن في لحظة تقول ممممم ، هو فيه اله للدنيا ديه ؟؟؟ او تعمل زي ليوناردو دافنشي مش متذكر اسمه بس هو كان نحات ولما انتهى من تمثال من التماثيل الي كان بيصنعها بدأ يخبط فيها ويطلب منها انها تنطق من كتر تماثلها مع الحقيقة جاتله فكرة انها ممكن تنطق !!

المقدمة ديه بوضح بيها فكرة ان الانسان ممكن يحصله انتكاسة لمبادئه في حالتين الملل او الزن ، ودوري هنا ابين ازاي الزن ممكن يأثر على اقوى مبادئك من خلال بعض الجمل الي بتتقال ، جمل فكرتها ان اي مبدء او قناعة بيتحط فيها الشك ، بتنهار .. وفي المقالة ديه هعرفك على كذا خطوة ضمنية بتتقال من الشخص بتخليكي تشكي في مبادئك وتتخلصي منها واحدة ورا التانية ، الحاجات ديه انا جربتها بنفسي بس في حدود طبعا ، احتمال تحسي انك سمعتي الجمل ديه قبل كده واحتمال تحسي انها اثرت فعلا بس سامحيني نصيحتي ليكي لو سمعتي جملة زي ديه مهما كان الشخص الي قدامك اوعى تقولي انا واثقة في نفسي وكلام الافلام ده ، لو شيخ او عالم في الدين برضه ممكن يتفتن فما بالك بيا وبيكي ..

التنويم الضمني قوي جدا وانا دايما بقول انها مهارة كل الناس محتاجة تعرفها وتتعلمها علشان تستخدمها او علشان تعرف لو حد تاني بيستخدمها عليك ، والخطوات الجاية هي خطوات ضمنية من حد ممكن ميكونش يعرف حاجة عن التنويم الضمني بس بيستخدمهم علشان يغوي اي بنت هو عايز يوصلها ويغير من مبدء او قناعة عندها ..

أولا : بناء الألفة

ديه دايما بتبقى الخطوة الاولى للولد علشان يشد البنت ناحيته ، وهي انه يبني بينه وبينها الفة ، بناء الالفة بيخلي الاتنين منسجمين جدا مع بعض وبيبنيها من خلال حركات الجسد ولو مقدرش فالصوت ولو مقدرش وبيتكلم على الانترنت مثلا فمن خلال الافكار ، عن طريق انه يوافق الطرف التاني على كلامه ويدعم كلامه ويتكلم بس في الحاجات العامة المتوافق عليها بينكم ، لما ده بيحصل بتتبني عملية اسمها عادة الموافقة ، بعديها الانسان بيبقى مستعد انه يقبل اي اقتراح بيتقال من اي طرف ، مدام بينهم موافقة والالفة مسبقة...

ثانيا : الندم

فيه نظرية في التنويم الضمني مبنية على انك لو قدرت تخلي انسان يندم من حاجة محصلتش هيعمل الي يقدر عليه علشان ميندمش ، كله عن طريق التخيل، بمعنى لو واحد عايز بنت تقابله مثلا، لو قالها عايز اقابلك ، احتمال كبير ترفض ، بس تعالوا نتخيل تأثير جملة زي " صحيح انا مشوفتكيش او كلمتك بس انا اول مرة احس بكده تجاه بنت قابلتها ، اول مرة احس اني عايز اشوف حد اوي كده، انا متاكد من مشاعري ناحيتك وعارف اني جاد وطريقتك ديه هتخليكي لوحدك طول عمرك وتكبري وتندمي على رفضك وهتبصي على اللحظة ديه وتقولي انا ليه مقابلتوش ؟؟ لانك لو فكرتي لثانية هتعرفي ان مشاعري حقيقية ، علشان كده كل الي هنعمله اننا نتقابل في مكان عام جدا بكرة الساعة 3 نص ساعة بالظبط نتكلم فيها كاي اتنين ناضجين وندرس علاقتنا ببعض .. "

نظرية التغيير بتقول "ندم + خطوات عملية = تغيير سلوكي"

ثالثا : زرع الافكار

زرع الافكار تقنية قوية جدا في التنويم الضمني بتعتمد على ان الشخص بدل مايقول طلبه بشكل مباشر لان ده ممكن يخليه يترفض ، ممكن يزرعه الاول في الطرف التاني ، على مراحل ، يعني مثلا ممكن يقول كبداية "انتي عارفة انا مستريحلك اوي انا مش عارف انتي حاسة ده ولا لا" ، "الواحد دايما يا .... بيحب يشوف الشخص التاني لان ده بيقوي علاقتهم اكتر" وبعدها بساعة مثلا يقولها "انتي عارفة امبارح شوفت واحد صاحبي عرفته من النت ومش هبالغ لو قولتلك انه اعز صاحب عندي" ، وبعد ساعة "لما ترتاحي لحد مش انتي بتحبي تشوفيه ؟ اه وانا كمان" وفي النهاية "بقولك يا .... ايه رايك لو تروحي مكان فلاني فيه هناك حفلة وهتعجبك وتبقى فرصة نشوف بعض واشوف حد انا بجد ارتاحتله وانتي عارفة اد ايه يهمني اشوفه " ...

رابعا : زرع الشك

اتكلمت من لحظات عن ان الشك لو دخل في اي مبدء بيهدمه ، واسهل طريقة للشك ان الولد لو اكتشف معارضة من البنت انها تقابله مثلا او تكلمه لانها "متربية" مثلا ، فاسهل حاجة انه يقولها "يا سلام يعني هو اي بنت تكلم ولد تبقى مش متربية؟ طب ماحنا بنتكلم عادي اهو ، ايه المشكلة؟ في اللحظة ديه البنت اتحطت في اطار صعب انها تكمل وتقول "اصلي متربية" فرضا ده في اسوأ الحالات انها تقول كده ، هتبدأ البنت تدور على سبب تاني ، ساعتها الولد مش هيعارضها في السبب الجديد لان مدام هي اتخلت عن سبب رفضها الاساسي ومسكت في اي سبب تاني فده معناه انها ممكن بعد فترة توافق ... الحل لده ان مهما قولتي ومهما اتقال منه اتمسكي بموقفك وبكلامك ، مجرد انك تتمسكي برأيك ده هيخليه يبعد ويعرف انه بيكلم بنت قوية وفاهمة هي بتقول ايه مش مجرد انها بتتكلم وخلاص

خامسا : رواية القصص

من الطرق الي ممكن تستخدم ضد البنت ان الولد يقولها قصص عن بنات محترمين جدا قابلهم واتكلم معاهم واكتشف ان عقلهم جميل جدا ومتفتح ومحترمين ولحد دلوقتي اصدقاء ويبدأ يقول قصص عن نفسه وعنهم كلها معناها ان الولد ده محترم جدا وان البنات الي بيعرفهم محترمين وبيوافقوا على اي طلب منه .. نفسيا العقل البشري بيستقبل اقتراحات القصص اسرع من اي طريقة تانية بسبب انه مش ملتزم يوافق او يعترض ، ديه مجرد قصة وانا بحكيها ومش مستني رأيك ، مثلا لو شوفت حد بيرجع هيحصلك ايه ؟ هتتقرف وتحس انك عايز ترجع انت كمان صح ؟ بالذات لو انتي بنت ، مع انه هو الي بيرجع بس بيجيلك ايحاء انك مكانه هو ، ديه طريقة عمل العقل البشرية وديه طريقة من طرق استخدام القصص وخطوة من خطوات الاغواء بالتنويم الضمني ..

سادسا : الاقتراحات المباشرة..

في اللحظة الي الولد هيبني فيها الالفة ويحصل على كذا موافقة من البنت ويحكي قصص ويزرع افكار ، هيبقى قدامه فرصة كويسة انه بس يقول طلبه بشكل مباشر علشان يكتشف ان البنت بتفكر زيه والاجمل من كده ان البنت هي الي ممكن تعرض الطلب ده او تديله رقم تليفونها او تطلب تقابله بشكل او باخر ..

سابعا : تجهيز العقل لتقبل المبادىء الجديدة

تجهيز العقل بالانجليزي Prime the conscious mind

ببساطة لو ولد عاز انه يقول لبنت "انا بحبك وعايز اقابلك" ، هتقوله لا انا مبقابلش ولاد مثلا ، ساعتها ممكن يزرع الشك في كلامها او ببساطة ممكن يجهز عقلها عن طريق انه يقول "انتي عارفة ساعات الواحد بيرفض حاجات بتبقى اساسية في حياته وبعد كده بيندم انه مخدش قرار معين او رفض حاجة جميلة جدا بالنسبة له وهو من جواه بيبقى عايزها بس حاجات تانية صغيرة بتخليه يرفضها ، حصلت معاكي؟" احتمال تحكيلك قصة مثلا مدعمة لكلامك، ساعتها ممكن يقولها "طيب انا عندي طلب منك وارجوا انك مترفضيش وتسمحي لنفسك انك تعملي حاجة احتمال تبدأي تحسي من جواكي انك مستعدة ليها ، ايه رايك لو اتقابلنا في مسرحية كذا كذا ؟" مثلا وخد بالك في كل الحالات مفيش ولد فاهم هيقول لبنت تعالى نتقابل تحت بيتكم مثلا او في جنينة ، البنت دايما محتاجة مبرر فهو بيديها مبرر وهما الاتنين عارفين انه وهمي ، المبرر انهم هيتقابلوا علشان يشوفوا مسرحية او يحضروا محاضرة او يروحوا حتى دار ايتام ..

ثامنا : الكلام العام

من اقوى الطرق المستخدم في الاغواء الضمني استخدام الكلام العام ، او تقنية الانماط اللغوية لملتون اريكسون مهمة الانماط ديه انها بتخلي المستمع مش ملتزم انه يوافق او يرفض بس بتخليه يعمل ربط بين الكلام الي بيتقال وبينه هو شخصيا ويدور على تاثير ليه ، فرضا ولد قال لبنت "انا مش عارف لو انتي حسيتي ولا لسة ان ده الوقت المناسب لينا اننا نتقابل فيه" ساعتها علشان البنت ترد هتبدأ تفكر وتشوف هي حاسة ولا لا ، وفي الوقت ده هيقولها "ده الوقت المناسب لينا اننا نتقابل فيه" ده اسمه امر مباشر ، في اللحظة الي هي هتسال نفسها ده الوقت المناسب ولا لا هيديها امر مباشر او توجيه معين لمشاعرها "ان هو ده الوقت المناسب" ، فيه 50 نمط لغوي لملتون اريكسون بيستخدم بشكل عام جدا بيساعد المنوم الضمني انه يقنع الطرف الاخر ان اي فكرة جاية منه هو شخصيا مش من المنوم ...

تاسعا : ايحاءات السلطة او القوة

وده جزء مهم جدا ولو حد اتمكن منه هتبقى مشكلة وخطر جدا على البنت ، ايحاءات القوة او السلطة ان الولد يوحي للبنت انه حد مصدر قوة يعني مثلا مدير شركة ، صاحب شركة ، غني ، ظابط حتى ، الانسان بطبعه بيتبع السلطة وده بان من ابحاث دكتور ستانلي ميلجرام ، وسيطرة هتلر على ملايين من البشر من خلال كلامه وسلطته ، لو البنت وصلها ايحاء ان الولد ده صاحب قوة فسهل انها تنجذب ليه ساعتها زي مابيقولوا "طلباته اوامر"

عاشرا : التجزئة

التجزئة تقنية من تقنيات الاصرار شبيهة بتقنية زرع الافكار ، بتعتمد على ان الولد بدل مايقول طلبه بشكل مباشر بيجزئه بحاجات بسيطة جدا في الاول علشان البنت تتعود انها توافق ساعتها بيبدأ يطلب منها طلبات اكتر واكبر ، زي انه يطلب انه يتعرف في البداية فلو وافقت يقولها تسمحيلنا نبقى اصحاب؟ لو وافقت طيب بين الصحاب مش بيبقى فيه تليفونات ؟ طيب مقابلات ؟ طيب ممكن صورتك ؟ طيب ممكن اكلمك مايك ؟ اشوفك كاميرا ؟ طيب وريني شعرك كده ، وهكذا ..

انا اسف بس هما اكيد مش عشرة بس ، كتير اوي علشان تعرفهم وتتعلمهم اكتر لازم تقرى وتتابع في مجال التنويم الضمني والاقناع النفسي ، هتكتشف ان فيه معلومات لازم كل الناس تعرفها ولادك لو ليك او صحابك او ليك انت شخصيا ، علشان بعد كده هتكتشف ان فيه تقنيات بتستخدم مش بس علشان الاغواء بس بتستخدم في الاقناع من قبل السياسيين او النصابين او المضللين وهكذا ...

ولاختي المؤمنة اهديلك الفيديو ده ان شاء الله يعجبك

http://www.youtube.com/watch?v=-4SgMSIalzc

وفي النهاية ، خليني اقولك ان الاسلام حل المشكلة ديه لما منع الاختلاط وامر البنت انها مترققش صوتها علشان ميطمعش فيها الي قلبه مرض ، فافتكر ده احسن حل لو فعلا خايفة على نفسك وعايزة تحمي نفسك من امثال الشخص ده الي ممكن يستخدم الخطوات ديه معاكي

لمزيد من المعلومات حول التنويم الضمني

http://www.nihadragab.com/?cat=7

نهاد رجب

المدرب العربي الاول في التنويم الضمني وتقنيات الاقناع النفسي

5 طرق لاقناع- نهادرجب

5 طرق للاقناع-نهاد رجب

التنويم الضمني هو عبارة عن تقنيات نفسية بتهدف لإقناع الشخص بفكرة من خلال زرعها جواها عن طريق القصص او الاقتراحات المباشرة او المتضمنة بأنواعها وده بيحصل في حالة الترانس ، او حالة ذهنية مخصصة معينة بتوصل الشخص ليها وبعد كده بتبدأ تستخدم تقنياتك عليه ..

ولإن الطريقة ديه بتنجح بنسبة 80% او اكتر فده بيزيد جواك القدرة والموهبة انك تقنع وتخلي الناس تستجيب ليك بشكل طبيعي جدا من غير ماحد يحس انك بتقنعه او انك عايز توصله رسالة ما .. وعلشان كده فانت محتاج تتمرن بشكل مستمر على تقنياتها ، التنويم الضمني الي بينجح فيه ده حد متمرن كويس اوي وفاهم الفكرة وفاهم القنيات وعنده تقنيات خاصة بيه ، والخبر الجميل هنا ان التمرين والتجارب مبتاخدش وقت ابدا وبتكتشف بعد كده انك بتستخدمهم بشكل طبيعي وتلقائي فبقى جزء من شخصيتك انك تقنع وتزرع افكار وتوجه الناس وتغير تفكيرهم ومشاعرهم لمجرد انك بتتكلم بطبيعتك وبتدمج التقنيات ديه في لغتك الخاصة بيك ..

بعض الناس راسلوني بإنهم استخدموا التقنيات الي اتكلمت عنها في خلال المقالات الي فاتت ، واتكلموا اد ايه التقنيات ديه قوية لدرجة انها جابت معاهم تأثير ونتيجة قوية جدا وكانوا مبسوطين جدا بيها ، وحاسين انها فرقت معاهم في حياتهم بشكل قوي جدا ، وبعض الناس برضه قالولي انهم جربوها ومنجحتش بشكل كامل ومع ذلك كان ليها أثرها وهنا احب احب اقولكم ان واحد صاحبي سألني ، امتى التقنيات ديه بتفشل ومكنش مني غير اني اقوله انها عمرها مابتفشل . . على الاقل بتجيب نتيجة غير الي انت متوقعها بالظبط لكن في النهاية بتجيب نتيجة ترضيك ..

النهاردة في خلال المقالة ديه هتكلم عن 5 اساليب للاقناع

والمرة ديه التقنيات ديه مش محتاجة منك انك تتمرن او تجرب .. ببساطة لانها مرتبطة بالتنويم الضمني بس تقدر تستخدمها من غير ماتدخل الشخص في حالة مختلفة ، وهتندهش في النهاية انها حاجات بسيطة جدا وبنعملها كل يوم تقريبا بس المميز هنا انك هيبقى معاك 5 تقينات مختلفة تقدر تستخدمهم في اي وقت ..

التقنية الاولى : ازاي ممكن تقنع اي حد عن طريق انك تطلب اكتر

"بكام ديه ياحاج؟ ب 25 يا ست ، لا هما 10 بس ، ماشي ياست "

تفتكر الحاج اتكسف علشان كده رضي ب 10 بس ؟

الفكرة ببساطة انك لما تيجي تطلب من حد حاجة ، فلوس مثلا ، اطلب دايما حاجات كبيرة علشان لو رفض ، اطلب منه اقل فيوافق ، الانسان بسهولة ممكن يرفض اول عرض او اول طلب ، لكن هيتحرج انه يرفض التاني بالذات لو التاني ارخص او اسهل انه يتنفذ، وديه حاجة بيعملوها الاطفال بشكل قوي ، لما يطلبوا من اهاليهم انهم يروحوا الملاهي مثلا ، الاب يرفض ويجادلوه ويصروا ويرفض وفي الاخر يقولوله طيب "نروح السينما بس؟" فيستريح الاب ويوافق وهو فاكر ان فيه عبء كبير راح من عليه ..

الشخص بيحس بالتزام اكتر انه ينفذلك الطلب التاني في حالة انه رفض الاول ، وبيحرج انه يرفض الطلب التاني (البديل) لو مكنش وافق على الطلب الاول ..

نفسيا الانسان بيحس بتأنيب ضمير لو رفضلك حاجة وبيحاول انه يعوضك في اي حاجة تانية ... علشان كده السر انك تطلب اكتر من المطلوب ولما يترفض طلبك اطلب بالظبط الي انت عايزه وغالبا هتلاقي ان طلبك التاني اتوافق عليه ...

التقنية الثانية : ازاي تقدر تقنع الشخص انه يشتري اي حاجة

وديه طريقة من الطرق الي بحب استخدامها بشكل شخصي ، فكرتها انك لو حبيت تبيع لحد حاجة ، فشوف هو محتاج ايه او ايه مشكلته وبعد كده اعرض خدماتك ، علشان تعرف هو محتاج ايه دور في كلامه على كلمات معينة زي "عايز" ، "نفسي في" ، "بحب" ، "محتاج" ، "مساعدة في" ، "ياريت" ، "بكره" ، "المشكلة ان" ..

على سبيل المثال ، لو حد قالك "انا محتاج انظم وقتي اكتر من كده" ، ممكن ساعتها توجهه لكورس في ادارة الوقت لمدرب معين ويبقى ليك نسبة ، او حد قالك "مخنوق من الحر ده" ، ممكن تقوله يروح معاك اسكندرية فرضا ، المهم انك بتعرض خدماتك بناء على احتياجات الشخص ولو الشخص مش محتاج خدمة من الخدمات الي بتقدمها فساعتها انت هتستخدم التنويم الضمني واللغة علشان تقنعه ان احتياجه لكذا ده معناه انه محتاج كذا وكذا ، وتبدأ عملية الربط وفي النهاية تعرض عليه خدمتك الاساسية ..

انت مش بتضلل او بتنصب على حد ، العملية مربحة للطرفين ، انت هتستفيد من الطريقة ديه والشخص التاني هتتحل مشاكله وهيحصل على الي هو عايزه ..

كل الي عليه تعمله انك تسأل الشخص اسئلة من نوعية :

ايه اكتر حاجة انت محتاجها في حياتك ؟

ايه المواقف الي لما تتحط فيها تحس انها مشاكل بالنسبة لك ؟

تحب تنجز في ايه في خلال الشهور الجاية ؟

في اي حاجة اقدر اعملها علشان تحصل على الي انت عايزه ؟

اول ماتعرف معلومات عن احتياجات الشخص ده ساعتها بتستخدم تقنية نفسية اسمها "الالتزام" بمعنى ان الشخص بيحس انه لازم يلتزم بأي حاجة قالها .. لانه لو اتصرف بطريقة غير الي هو اعلن انه ملتزم بيها ده هيخليه متضايق وقلقان ..

من خلال انك تقوله "انا فاكر انك قولتلي ان عندك مشاكل مع مراتك ونفسك تحلها ، طيب لاقيتلك دكتور ممكن يحللك مشاكلك تحب تجرب؟"

نفسيا : صعب انه يرفض اقتراح زي ده لانه لو رفض فده معناه انه مش ملتزم بكلامه

حاول دايما انك تخلي ناس تانية تسمعه وهو بيتكلم ولو قدرت خليه يكتب الي هو عايزه على ورقة او اكتبها انت كانك بتهزر .. المهم انها تبقى دليل ليك بعد كده تخليه من خلاله يلتزم بكلمته معاك ..

التقنية التالتة : استخدام الاسامي المشهورة والمتع الخاصة للاقناع

لو قدرت انك تربط بين المنتج بتاعك واي اسم تاني مشهور ومعروف فساعتها نجاحك هيبقى عالي جدا وده الي بنشوفه دايما في مباريات كأس العالم ووجود رعاة كل هدفهم انهم يقولوا ان الجزم الي بيتلعب بيها من نايك برعاية نايك او ان الكورة اديداس ، او ان المشروب الرسمي بيبسي ، فالفكرة انهم بيربطوا بين حدث مهم اوي زي كاس العالم وبين المنتج بتاعهم ، بس طبعا انت مش محتاج انك تدفع الفلوس ديه كلها علشان تربط المنتج بتاعك ، ممكن ببساطة تعمل حاجة تانية زي انك تقول :

"عايز تبقى عنتر زمانك ؟؟ عايز صوتك يبقى صوت عمرو دياب؟ اشترك في الاكاديمية المصرية لشفط الوزن " .. ده مجرد مثال علشان يقربلك الفكرة ، انت ممكن تستخدم نفس التقنية بكذا طريقة تانية ولكذا موقف مختلف ..

الجزء التاني من التقنية بيعتمد على المتع الخاصة للشخص التاني ، فرضا واحد بيحب الصيد ، وعايز تقنعه انه يشترك في دورة مثلا او خلينا نقول يشتري تليفون .. ممكن تقوله الاتي "مع تليفون نوكيا هتقدر انك تروح لبحر كبير وواسع من الامكانيات والفرص الي هتقدر تصطادها من خلال مميزات التليفون الجديدة " الفكرة انك بتستخدم اهتمامات الشخص عن طريق انك تسأله اسئلة ومن اجابتها هتعرف نوعية الاهتمامات الشخصية وتبدأ على اساسها تظبط رسالتك الدعائية علشان تقنعه ..

التقنية الرابعة : قانون التوقع

عمرك سمعت جملة "انت بتحصل على ماتتوقع الحصول عليه؟"

ديه حقيقة مدعمة بقانون اسمه قانون التوقع وهنا هقولكم على 3 طرق تستخدم فيهم التوقع علشان تقنع الناس وتدخلهم في حالة التقبل للاقتراحات الي هتقولهالهم..

الطريقة الاولى : قاعدة الباركينسون

ديه طريقة تحفة لو عايز الشخص يخلص شغل بياخد 3 شهور تخليه يخلصه في 3 اسابيع ، وده عن طريق انك تبدأ تقوله الشغل ده بيخلص في 3 اسابيع ، ولو لاقيت الشخص فعلا ميقدرش انه يخلصه في 3 اسابيع ممكن تقوله قبل ماينتهوا "بسبب انك اظهرت التزام وطاقة عالية فانا همدلك المدة اسبوعين كمان" ده هيخلي الشخص يشكرك لان بالنسبة له اسبوعين كتير اوي مع ان المدة الحقيقة اكتر من 3 شهور

عداء سنة 1952 كسر الرقم العالمي في جري 4 ميل لما قدر انه يجريهم في اقل من 4 دقايق وده في الوقت الي كان فيه اعتقاد قوي ان محدش يقدر يكسر الرقم ده ، ولما هو كسره تاني سنة كان فيه 17 عداء قدروا يكسروا الرقم في اقل من 4 دقايق ، وده لانهم توقعوا ده بسبب انهم سمعوا عن حد قدر يعملها ، فانت لو قولت لحد ان الشغل ده بيخلص في اسبوع او ساعتين حتى هتلزم الشخص انه يخلصه في المدة ديه بس ، والاهم من كده انك ممكن تستخدمهم مع حد بيذاكر لما تقوله "اي حمار ممكن يجيب 90% على الاقل في المادة ديه "

الطريقة التانية : خليك محدد

الطريقة التانية علشان تقوي التوقع في دماغ حد وتخليه يجيب احسن ماعنده انك تقوله "انا عارف انك بتكتب كويس جدا لدرجة انك تقدر تكتب 5 مقالات في 5 ساعات"

الطريقة التالتة : توقع ان الناس يتوقعونك :D

الفكرة انك لما تشوف حد لابس نضارة وبدلة بيضا هتقول عليه دكتور ، لو لاقيت حد لابس بدلة سودا هتقول عليه رجل اعمال ، لو لاقيت حد لابس تيشيرت مقطع هتقول عليه سيس ، الناس بيتوقعوا منك نتيجة كويسة بناءا على لبسك ومظهرك العام علشان كده دايما خد بالك من لبسك وطريقتك واسلوب كلامك لان المشكلة العامة اننا كبشر دايما بنقول رأينا في اي حد نشوفه لأول مرة ، فخلي دايما الانطباع الاول ليك في قمته ..

التقنية الخامسة : احكي قصة

تحب احكيلك قصة ؟ لما تسمع جملة زي ديه ، انتباهك كله بيروح في القصة ، ورواية القصة لعميل او لشخص انت عايز تقنعه طريقة عبقرية علشان متمرش على الردار بتاعه الي هو عقله الواعي ، العقل الواعي زي الحارس على قصر ، مينفعش تدخل القصر الا لازم الاول تشد الانتباه وتلغى الواعي من خلال قصة ، محدش بيعترض على قصة ، ببساطة لانه مش ملزم من البداية انه يقتنع بحاجة ، انت مجرد انك بتقول قصة ، في القصة ديه ممكن تحكي عن تجربة خاصة لحد في نفس موقف العميل بتاعك وازاي اختار المنتج الي انت بتقدمه وبقى مبسوط بكده ، وتحكي الخطوات الي العميل التاني عملها وتفاصيل الاتفاق ، كمجرد قصة ، ممكن قصة كوميدية او قصة عادية بتوصل من خلالها افكار معينة عنك ، اخلاقيات معينة ، كل الي هيحصل ان الشخص التاني بيطبق اي حاجة على نفسه ولو بشكل لاواعي ..

في خلال القصة انت بتاخد الشخص من حالة وبتوديه في رحلة في عالم تاني بيبقى فيه متقبل اكتر للاقتراحات والتغييرات الجديدة ..

في اللحظة ديه بتبدأ تقوله التعديلات الجديدة الي انت عايزه يطبقها في حياته ، التنويم الضمني مبني بشكل قوي على استخدام القصص والحقيقة ان اغلب تقنيات التنويم الضمني بيتم تطبيقها في النهاية في شكل قصة بسيطة بتوصل من خلالها فكرة او اقتراح قوي ..

فيه اكتر من 250 تقنية مختلفة كل تقنية مختلفة ممكن تاخدك وتاخد عملية الاقناع لمرحلة اقوى تبقى فيها مؤثر اكتر ومقنع اكتر .. وان شاء الله في خلال دورة التنويم الضمني هتكلم عن 30 تقنية مختلفة ممكن تستخدمهم حالا في عمليات الاقناع في شغلك او علاقاتك الاجتماعية ..

المراجع ، مايكل ليي ، كيفن هوجان

نهاد رجب

مدرب تنويم ضمني متخصص في الاقناع الضمني

معالج في التنويم الايحائي

مؤسس الشبكة العربية للتنمية البشرية

http://www.arabhd.com

عقيدة

عقيدة 

من وقت للتاني بنلاقي ناس طالعين فجأة بيتكلموا في الاسلام ، منهم الي عايز يغيره ويعدل بس شوية حاجات فيه ، ببساطة علشان تعاليم الاسلام مينفعش تتطبق في 2009.

ومنهم الي بيدعي انه اكتشف اخطاء نحوية في القرآن ، ومنهم الى بيشكك في السنة ، ومنهم الي بيشتم في الصحابة ومنهم الي بيشكك في طهارة امهات المسلمين ، ومنهم الي بيشكك في البخارى ومسلم ، والي بيفتي والي بيعترض والي بيندد وبيشجب والي بيتكلم ..

كنت في ندوة لدكتور سنان ، كان بيتكلم فيها عن النجاح والتنمية البشرية (ده مبدئيا).. وبيناقش كتاب من مؤلفاته مش متذكر عنوانه ، الراجل كان لابس نضارة وقاعد على الكرسي وبدأ قالنا ، انا النهاردة هزغزغكم – كنا مجموعة شباب ولاد وبنات في مكان معروف – وهقولكم ايه هو طريق النجاح ، انا بعادتي متعود اني اسمع لأي قرد بيتكلم في التنمية البشرية ، وقرد ديه مش شتيمة ، الراجل استرسل وبدء يتكلم عن اسرار النجاح ، بدأ يعرض صور على الكمبيوتر ويوريهالنا ، وكل صورة كان بيتكلم شوية والمفروض انها خطوة للنجاح ، وبدأ يعرض صور لستات شبه عرايا في فريق كورة قدم نسائي ، كانوا موديلز بس متصورين بشورتات وفانلات ، وكلمنا عن دور المرأة في المجتمع وانها لازم تشترك في الحاجات الرجولية وان مفيش فرق بين الراجل والست وهو لسة عارض نفس الصورة وانا بالنسبة لي معنديش مانع الصورة حلوة يعني بس ايه الي دخلها في دور المرأة ، انا عارف ان الصورة ليها رمز لدور قويم للمرأة .. بس الكلام الي كان بيقوله مكنش متطابق ، كان عارض صورة لشوية عاهرات وبيكلم البنات الي في المكان عن النجاح ، الموقف فكرني بمحمد هنيدي لما سأل الممثلة "هو انتي بوستي الكومسري من بوقه في سياق الدراما برضه؟" ..

من دور المرأة اتكلم في الدين ، وبدأ قال ان الاسلام من اعظم الاديان ، بس شيوخ الفضائيات بوظوا الدين ، وكل من هب ودب بيتكلم في الدين ، واتريق على الناس الي مقصرة الجلباب والي لابسين حجاب والناس الي مطلقة لحيتهم والناس بياكلوا باليمين وبيدخلوا الحمام برجلهم الشمال ، لا ومش كده وبس ده كمان استغرب اوي من جملة "اعوذ بالله من الخبث والخبائث " وضحك وقال وايه الفرق ماهو الخبث هو الخبائث ، واسترسل واتكلم وكلنا ساكتين ..

استنيته تحت بعد ما الندوة خلصت وسالته، هو حضرتك خريج طب اسنان قسم شريعة اسلامية ؟ قالي ازاي يعني؟ قولتله اصلك بتتكلم في الدين بطريقة حسستني انك متخصص ، هو حضرتك شيخ ؟ قالي مش لازم ابقى شيخ ، انا مفكر اسلامي ، قولتله طيب كمفكر اسلامي ممكن اطلب منك طلب؟ متجيبش سيرة اسيادك تاني على لسانك..

يجماعة انا واحد مش متخصص وممكن اكون منتكس في صلاتي ومش بديلها حقها بس كل الي اعرفه ان ابويا رباني على عقيدة وفطرة . الدكتور الجاهل ميعرفش ان الخبث جمع خبيث – ذكور الشياطين والخبائث جمع خبيثة ، اناث الشياطين ، يا ابو جهل ، اطلاق اللحية سنة عن النبي صلى الله عليه وسلم وانت جاي تتريق؟ ، الاكل باليمين سنة عن النبي صلى الله عليه وسلم وانت جاي تتريق؟ ، دخول الحمام بالرجل الشمال والاستيعاذ من الدين وانت جاي تتريق !!؟ ، ناس ماتت وناس ادفنت صاحية علشان تنشر الدين وناس اتجلدت وناس اتحرقت وناس اتنبذت وناس اتدبحت علشان تنشر الدين وانت بتتريق بنضارتك ديه ؟؟ مروة الشربيني اتقتلت علشان بتنفذ أمر الله وانت جاي تشكك وتتريق؟ مروة الشربيني لو من عيلتك كان زمانها اشرف حد شوفته فيكم وانت بتتريق ؟؟، انت مش مفكر اسلامي ، انت فاجر متأسلم ، كل شوية يطلعلنا قرد جديد ويتكلم عن شيوخ الفضائيات ويشتم فيهم ويبدأ يفتي ، لأ وبجرأة تامة يتكلم عن ضعف احاديث في السنة ، كأنه هو الوحيد الي فهم والي صحي من النوم هرش في ضهره لمو آخذه وجاله الوحي وقاله لازم تنبه الناس ان الحديث ده ضعيف ، اصل فيه ملايين قبلك متخلفين عقليا مكنوش عارفين وانت الوحيد الي فهم بروح والدته ، انت الي عرفت ان البخاري الي كتب أصح كتاب على الارض بعد القرآن الكريم غلطان وسهى عليه ، اصل كل العلماء في عصره كانوا متخلفين بس انت جيت وفهمتها ، ابن العثيمين معرفهاش ، ابن جبرين الله يرحمه معرفهاش ، شيوخ الفضائيات معرفوهاش ، السلف الصالح اسيادك معرفوهاش ، انت الي عرفت ، اه يالئيم ياذكي انت ..

كل واحد عايز يتعرف، يطلع يشتم ويقول الجملة المشهورة "احنا هنمسك في صغائر الامور وننسى المشاكل الكبييييييييرة التانية" ، "هنمسك في تقصير البنطلون واطلاق اللحية والامريكان طلعوا القمر!!" ، "هنمسك في تعاليم قديمة وننسيب المشاكل الاكبر"

انت حد ولادك الصغيرين بيروحوا النادي يلعبوا باسكت ويلبسوا جينز، والي قدهم كانوا بيقودوا جيوش ، انت بتصحى من النوم بتختار فطارك ، والي سبقك كان بيخيروه بين حياته وموته ، بتقوم تمسك شنطتك ، وكانوا بيناموا بسيوفهم ، بتصوم رمضان وفاكر نفسك شيخ ، وهما مكنوش بياكلوا طول السنة ، ده الفرق بينك وبينهم ودلوقتي انت جاي تشكك فيهم . العقيدة الواسطية اتكتبت من الضهر للمغرب ، انت كتبت ايه ؟ العالم استفاد منك في ايه ؟ انت مين ؟ علشان تسمي نفسك مفكر اسلامي .. في الوقت الي كنا بنهتم فيه بالسنن ديه كنا ساعتها في الاندلس ، في الوقت الي كنا بندخل الحمام بالشمال و نسمي قبل ماناكل وناكل باليمين كان عندنا عزة والمسلم لما كان بيعدي على مكان فيه كفرة او يهود كانوا بيقوموا يقفوا ، لما كنا بنسمع النداء كنا بنجاهد بارواحنا ، كنا عارفين رايحين فين وبنعمل ايه ،

اي حد دلوقتي بقى يطلع يقول يجماعة بطلوا تخلف ، حجاب ايه ، هو الحجاب هو الي هيخلي البنت محترمة ؟؟ هو الحجاب هو الدين ؟ ماهو انت لو ترضاها على امك ، او اختك انا مرضهاش ، لو الاله بيقولي خلي اختك تمشي كده ، لو بيقولي عيش حياتك ، لو مبيراعيش فطرة الغيرة الي في قلب كل راجل فينا ، لو ده فعلا الي المفروض اعبده ، فلأ ، يروح يعبد نفسه ، انا بعبد الله جل وعلا، لكن الهك مش تبعي ، هتسمي نفسك مفكر ، جزرة ، بطيخ ، مش مشكلتي ، متجيش عندي ، انت لو موجود من الف و ربعمية سنة كان زمان رقبتك مقطوعة.. ولو مفيش كلمة واحدة تثبت شرعية الحجاب في شرع الي جابوك ، فموت مروة بألف كتاب .

لو مشكلتك ان الرسول صلى الله عليه وسلم اتجوز 9 ، فانا معنديش مانع ، ولا هسأل فيها ولا تفرق معايا بالعكس الرسول قدوة ليا ، انا بقى هقصر الجلباب واطلق لحيتي وهدخل الحمام برجلي الشمال وهستعيذ بالله من الخبث والخبائث ومنك انت شخصيا اين كنت ، ومش هسلم على حد في صلاة الجمعة لانها بدعة ومش هحط فلوسي في بنك لان ده ربا حتى لو شيخ الازهر او مفتي الجمهورية طلع حلله، ومش هاكل بإيدي الشمال ، ومش هقرى الفاتحة على الميت لان الرسول صلى الله عليه وسلم معملهاش ومأمرش بيها ولانها بدعة ، ومش هقرالك حاجة وموت بغيظك وهسمع شيوخ الفضائيات امثال الشيخ محمد حسان ومحمود المصري وابو اسحاق الحويني والشيخ يعقوب ومش هاخد فتوى من حد مش مطلق لحيته ، لانك هتكتشف في الاخر ان في الوقت الي انت بتقرب فيه من الغرب وبتاخد تعاليمهم ، الغرب نفسهم بيقربوا من ديننا وبياخدوا معتقداتنا وافكارنا الي بتقول عليها بالية وقديمة ، وفكرة اني اشوف واحدة امريكية محجبة متعرفش كلمة عربي بتتكلم عن الدين وبتدافع عن الحجاب فصدقني هي بألف كلب زيك .

في النهاية ، انا مش متخصص ولا انا شيخ ولا مفكر اسلامي ولا عالم ذرة علشان اكتب الكلام ده ، لو تعلمون ما اعلم لضربتموني بالنعال بس انا بطلب منكم لو لاقيتوا حد من امثال الناس ديه متسمعوش ليهم ،اتعلموا علشان تقدروا تردوا ، صعب انك تلاقي حد بيغير في عقيدتك وانت مش عارف تعمل حاجة ..

نهاد رجب

الاجرام فى استخدام التنويم الضمنى

الاجرام فى استخدام التنويم الضمنى

ماهو الشىء الذي كلما لمسته صاح ؟؟

هل انت في حاجة الي التفكير بصفاء؟

الجرس

شاي ليبتون يقدر على كده !

--

كريم كان عنده مشكلة ، كريم راح لكاريير ، كريم اشترى كاريير ، كاريير عرضت خدماتها على كريم ... كريم ركب التكييف ... كريم مبسوط

التنويم الضمني ، هو تخصص في التنويم الايحائي بس استخداماته مختلفة ، في الوقت الي بتستخدم فيها تقنيات التنويم الايحائي للعلاج ، بيستخدم التنويم الضمني نفس التقنيات وتقنيات تانية في عمليات الاقناع والتأثير في حالة اليقظة ...

بمعنى ان التنويم الضمني او ال

Covert/Conversational Hypnosis

هو عملية استخدام التنويم الايحائي في الكلام في مرحلة اليقظة لاحداث التغيير والتأثير ..

من خلال الإعلانين الي كتبتهم فوق هعرفك بسرعة على تقنيتين او اكتر من تقنيات التنويم الضمني علشان تعرف ازاي المعلنيين بيستخدموا التنويم الضمني كل يوم معانا .. تعالى ناخد اول اعلان :

"ماهو الشىء الذي كلما لمسته صاح ؟؟

هل انت في حاجة الي التفكير بصفاء؟

الجرس

شاي ليبتون يقدر على كده ! "

احتمال تكون شوفت الاعلان ده ، واحتمال يكون تأثيره عليك كان عالي ، بسبب ان الاعلان فكرته كالآتي : شد الانتباه شغل الوعي، الارباك ، اقتراح مباشر

ايه اسرع حاجة ممكن تشد بيها انتباه حد ؟

تمام ، "اقولك فزورة؟" "سمعت اخر نكتة؟" "اقولك سر" ، "عارف مين مات؟"

مجرد كلمات بتقولها بتشد انتباه الشخص وفي التنويم الضمني اي حاجة بتشد الانتباه تبقى تنويم ، في الاعلان ده بدأ معانا بشد الانتباه "ماهو الشىء ...." جذب الانتباه ببراعة وكانت تاني خطوة انه يلغى الوعي في اللحظة الي هتفكر فيها هو ايه هي الحاجة ديه هيقولك "هل انت في حاجة الي التفكير بصفاء؟ (سؤال تاني ) وده معناه تحميل اكتر على الوعي بتاعك فبتبدأ تنشغل في السؤال الاول ثم التاني ، ولما تستسلم ومتعرفش الاجابة بتبقى في حالة تقبل للاجابة .. نظام غلب حماري واي حاجة هتتقال هتقول "اهاااااااااااااااا" ، وهتقبلها ببساطة لانك استسلمت ، في اللحظة الي هتستلم فيها هيقولك "الجرس" ، وفي خلال مانت في لحظة اسمها اللحظة الابداعية الي اتكلم عنها ملتون اريكسون وقال ان في اللحظة ديه العقل بيبقى متقبل لأي اقتراح ، بيعملك ارباك ، والارباك ده ليه كذا شكل بس معناه انه بيزود الحمل على الوعي اكتر فبتنسى انك تجادل او انك تعترض على الاقتراح نفسه ، نوع الارباك هو "ربط المعنى" يعني جملة "هل انت في حاجة الي التفكير بصفاء؟" وفي النص "الجرس" والجملة التالتة "شاي ليبتون يقدر على كده" الاقتراح الحقيقي وديه المفجأة انه بيقولك "انت في حاجة الى التفكير بصفاء شاي ليبتون" ، لان هل وعلامة الاستفهام الي بيفهمها الواعي بس وبيبدأ ياخدها على اساس انها سؤال لكن اللاوعي ميعرفش يعني ايه سؤال فبيلغي السؤال وبيستخرج الاوامر .. ده واخيرا انه عملك حالة امنيسا او نسيان وخلاك تنسى جملة "هل انت في حاجة الى التفكير بصفاء؟" وانت نسيتها لانك لما تبقى في مرحلة ال "اهاااااااااااا" ديه ، بتفكر في الفزورة نفسها وبتنسى الاقترحات المضمنة الي جوا ولما ده يحصل عقلك الواعي مش بيعترض على الاقتراح زي ماقولت والاقتراح بيبقى ضمني وبيدخل مباشرة لعقلك اللاواعي .. سحر مش كده ؟

"كريم كان عنده مشكلة ، كريم راح لكاريير ، كريم اشترى كاريير ، كاريير عرضت خدماتها على كريم ... كريم ركب التكييف ... كريم مبسوط "

اما الاعلان ده فمشكلة متحركة ، بجد انا لما شوفته اتخضيت ، نظام احمد حلمي "هو ينفع يعرضوا ده على التلفزيون!!"

الاعلان شكله عادي جدا ، عن واحد اسمه كريم ، مش هتفلسف فيه ، لان كل حاجة مفصلة في دورة التنويم الضمني علشان كده انا هتكلم باختصار عن تقنية من التقنيات الي استخدموها في الاعلان ده ، التقنية اسمها ال PCAT

وديه اختصار ل Problem , Confuse , Activiate Resources and Transformation

والطريقة انه اولا بيقولك المشكلة ايه "مشكلة كريم انه كان حران وكان متضايق وطالع عينه" ، ثانيا بيعملك ارباك بتقنية من تقنيات الارباك ، ثالثا انه بيفعل الحلول ، والحل الي هو قدامه ان "كريم اتعرف على كاريير وخدمات كاريير" وفي الاخر مرحلة التحول او تثبيت الاقتراح "كريم اشترى كاريير" وبعد كده عملك تقنية اسمها ال Posthypnotic suggestion

او اقتراح مابعد التنويم ، وده انه قالك كريم بقى فرحان وسعيد ، انا مش فاكر الاعلان بالظبط بس الجملة ديه الى حد ما هي الاعلان ، من التقنيات التانية الي بيستخدمها نفس الاعلان تقنية الاستراتيجية ، وديه رجالة البرمجة العصبية عارفينها ، اسهل طريقة لإقناع حد انك تقوله قصة عن واحد تاني خالص وفي القصة تقوله ايه الخطوات الي الشخص ده عملها علشان يوصل للنتيجة ديه ، فرضا انت راجل بتبيع عربيات ، فبتقول للشخص "تعرف مرة واحد جيه اسمه محمد" ، ملحوظة "مرة واحد" بتشد الانتباه لان الشخص هيعرف انك هتقول قصة وده معناه انك مش بتلزمه بحاجة فهيبدأ يسمعك ويدخل في حالة ال "اهاااااااااا" ديه ، فبتكمل وتقوله كان جاي وعايز عربية كذا وكذا ، دخل العربي جربها حس فيها بالراحة وخرج منها اتفق معايا انه يشتريها ومضى الورق ودلوقتي هو فرحات كتير اوي فحت ..

انت بترسم في دماغ الشخص الخطوات الي هو كمان هيعملها ، اول مايدخل العربية ، بتقوله هيحس بايه هيشوف ايه هيعمل ايه وهيتصرف ازاي ، على مستوى لاواعي الشخص هيتعلم منك وهيحصله نفس الي حصل لمحمد العميل السابق ليك ..

ديه كانت الاعلانات المدبلجة . تعالوا نشوف الاعلانات المصري

"نفسك تخس ؟؟؟ ايييييييييه بقولك انت ، ايوة انتي ، متبصش بعيد ياض هجيبك ، انت ايوة انت ، اتصل بقى هه ؟ مستنيك "

يعني الحمد لله احنا قريب جدا في خلال الكام الف سنة الي جايين هنبدأ نعرف يعني ايه فن اعلاني .. المهم اتمنى انك تكون استفدت واي اعلان تحس انه غريب ياريت تشاركنا بيه ..

وفي النهاية ، خليني اقولك مفجأة ، مشكلة اي حد انه صعب في البداية انه يصدق في التنويم الضمني ، بس لما نفس الشخص ده بييجي الدورة وبيلاحظ ان التقنيات ديه بتستخدم ضده او لصالحه كل يوم ، بيبدأ يقتنع شوية شوية وفي النهاية بيحس انه عايز يعرف اكتر واكتر ، بيبص حواليه مش بيلاقي حد فاهم في الموضوع ده ولما بيلاقي ... بيبقى مبسوط اوي ، وعايز يشارك ..

في دورة التنويم الضمني هنتعلم ايه تقنيات التنويم في عمليات الاقناع وازاي ممكن نستخدمها بمهارة ..

;)

اتمنى تكون عرفت نوع التقنيات الي استخدمتها عليك دلوقتي وتبدأ تجربها في حياتك..

نهاد رجب

مدرب تنويم ضمني

معالج بالتنويم الايحائي

مؤسس الشبكة العربية للتنمية البشرية

http://www.arabhd.com

http://www.nihadragab.com

تنويم ضمنى: ارسال فكرة لاواعيا

تنويم ضمنى ارسال فكرة لاواعيا

طيب ياجماعة انا اتكلمت كتير في التنويم الضمني ، خلينا نجرب اسلوب لذيذ وسهل ممكن تستخدمه مع الناس وتبهرهم بيه ، الفكرة انك هتقول لحد يفكر في اسم وقبل ميقولهولك هتكون انت عارف هو هيقول ايه ..

غريبة مش كده ؟ بس خليني اسالك هل فيه اي طريقة عقلية تعرفها ممكن تعمل كده ؟ هل ده شىء طبيعي اساسا ؟

هايل

الطريقة الي بستخدمها كالآتي :

"طيب عايزك تفكر في اسم كاتب مصري مشهور ميت او عايش بس معروف جدا ، بس متفكرش فيه دلوقتي لإني الاول هفكر انا فيه وهحفظه جوايا ولما احفظه هبعتهولك علشان تستقبله وتجيبه وتحفظه جواك وتبعتهولي اجيبه وبكده نبقى احنا الاتنين هنختار اننا نجيبه ونحفظه جوانا مع بعض متختارش اننا نجيبه ونحفظه دلوقتي الا لما تستعد، الغي اي اسم لاي كاتب كنت بتفكر فيه وشوف اول اسم جيه على دماغك دلوقتي " قوله حالا ...

بنسبة 92% هتختار : نجيب محفوظ

الطريقة ديه بتستخدم لما تحب تخلي حد يقول حاجة او يختار اختيار معين انت عايزه يختاره وليه كذا طريقة وكذا اسلوب ، انا معرفش اسم الكاتب جيه معاك ايه بس غالبا هتلاقيه نجيب محفوظ ، لما تحلل القطعة الي قدامك هتكتشف اني فعلا قولت اسمه كذا مرة بكذا طريقة ..

راسلني احكيلي تجربتك وشاركها مع اصحابك بس خد بالك هي مش بالسهولة ديه ومحتاجة تمرين ومحتاجة بناء الفة مع الشخص الاول .. لو فشلت مش مشكلة لانك كده بتتمرن وهتنجح المرة الي بعدها ..

وان شاء الله في خلال دورة التنويم الضمني في الاقناع والتاثير هتتعرف على تقنيات تحفة تخليك تنط جوة الشخص نفسه وتخليه يتكلم بلسانك :D

مستنيكم

نهاد رجب

مدرب تنويم ضمني

معالج بالتنويم الايحائي

http://www.arabhd.com

الاقناع باستخدام تقنيات التويم الايحائى

الاقناع باستخدام تقنيات التنويم الايحائي

احتمال تكون سمعت خطبة باراك حسين على ابو مي اوباما ، وغالبا كنت من ضمن الملايين الي انبهروا بخطبته ، انا مش هقولك اني بطل ، انا نفسي انبهرت بكلامه ، بالذات لما عرفت ان نص كلامه لو مش كله بيستخدم فيه تقنيات اسمها التنويم الضمني او المخفي او ال Covert Hypnosis

عمرك شوفت حد بيسقف لما يسمع آية قرآنية ؟ او لما يسمع حديث شريف؟ ايه الايمان العالي ده ، بالذات لما تعرف ان الي حضروا الخطبة كانوا المعارضة والاخوان المسلمين وطلبة وجميع الفئات المصرية المتضامن منهم والمعارض ومع ذلك كان اول مرة الاقيهم مجتمعين على حب باراك اوباما ، وكلهم بيسقفوا ، بس لما تعيد نظر في كلامه هتكتشف حاجة مهمة اوي احنا خدنا بالنا منها بعد مامشي بفترة والموضوع هدي ، هتكتشف انه مقالش حاجة جديدة تماما وموعدش بحاجة ، وقال كل الي احنا عارفينه بس بطريقة خلتنا كلنا نسقف و وي لوف يو اوباما ...

ايه رايك لو قدرت انك مجرد انك تتكلم تخلي الناس تسمع وتقتنع ؟ انا مش هقولك ان لازم تبقى الحجة بالحجة او انك تكون مؤمن بالموضوع وبتتكلم بشكل منطقي ومتسلسل ! تماما ، انا هقولك عكس كده تماما انت مش محتاج حجة لهدفك او فكرتك بس محتاج انك تؤمن بيه ومش محتاج انك تتكلم بشكل منطقي او حتى متسلسل .. ده اسمه التنويم الايحائي الكلامي او ال Conversational Hypnosis

فكرته ان في حالة الترانس / السرحان كل حاجة ممكنة ، فكرته انك بتربط العقل الواعي وبتربكه وفي اللحظة الي بينشغل فيها العقل في فك نفسه من كمية الروابط الي انت دخلته فيها بتقوله أمر بينفذه ، ممكن يبقى تنفيذ داخلي في شكل امر غير مباشر زي "الواحد دايما بيتعلم ياخد قرار" او خارجي زي "هوالباب ده لسة مفتوح؟" في الحالتين بينفذ وبياخد رد فعل ، الاول انه بيتعلم ياخد قرارات والتاني انه بيقفل الباب . طبعا الموضوع معقد اكتر من كده بكتير ، بس خليني اقولك حاجة تبين ازاي العقل اللاواعي -وهو ده المسئول عن التنفيذ -بيشتغل :

من اسبوع حلمت ببنت زميلتي من ايام الاكاديمية اسمها اميرة بقالي تقريبا اكتر من سنتين معرفش عنها حاجة ، حلمت اني طالع الاكاديمية ودوست بالغلط على رجليها وحتى مكلمتهاش وكملت طريقي عادي بس لاحظت انها كانت لابسة نقاب وانت عارف في الحلم انت بتبقى عارف وخلاص بس مبتبقاش عارف انت عرفت ازاي وكانت ماشية مع هبة صاحبتها، تاني يوم جالي تليفون من رقم غريب وانا مبردش على ارقام غريبة الا نادرا ورديت على الرقم لاقيتها بتقولي نهاد ؟ قولتلها اميرة ؟ قالتلي ايه ده انت عرفت صوتي ؟ قولتلها صدقيني انا مش عارف حاجة بس حسيت يعني ، قالتلي اولا انا جبت رقمك من هبة وثانيا انا زعلانة منك ، قولتلها ليه ؟ قالتلي امبارح معدي من شارع خيرت وده شارع في السيدة زينب وخبطتني وحتى مابصتش ، ساعتها اتصدمت وبرقت وسكت ، قولتلها انتي كنتي لابسة نقاب ؟ قالتلي ايوة ، قولتلها انا شوفتك بس مخدتش بالي ، قالتلي انا شاورتلك .. طبعا مكنش ينفع اقولها "انا حلمت بيكي والا ممكن تتفسر بشكل غلط" ..

انت متخيل الي حصل؟ احتمال لما خبطتها وانا مقصدش هي طلعت اي صوت ، عقلي لقطت الصوت وحلله وعرف انه صوت اميرة ، ترجملي الموقف كله في خلال حلم احداثه مختلفة بس اميرة كانت لابسة فيه نقاب ، انا نفسي مش فاكر اني مشيت من الشارع ده اساسا بس هو فاكر وعارف ولاحظ لدرجة انه عرف انها اميرة وهي مغطية وشها كله فحتى لو كانت كلمتني ساعتها مكنتش هعرفها .. ده غير اني في الحلم شوفت هبة وهبة هي الشخص الوحيد الي معاه رقمي وعقلي حلل ده وعرفني في رسالة انها هتاخد رقمك من هبة .. مع اني بدرب الكلام ده بس خفت ... وده بيؤكد اد ايه العقل اللاواعي قوي جدا .. في اللحظة الي بتبقى فيها سرحان ، بيبدأ يشتغل ويلقط اي حاجة ويترجمها جواه من غير مايعترض او يقاوم ..

في اللحظة ديه انا كنت بفكر في حاجات كتير في نفس الوقت ومش واخد بالي مين بيعدي ومين بيتكلم ومين بيقول ايه ، بس لانه بيستقبل من 2 ونص مليون ل 3 بليون معلومة في الثانية الواحدة فهو واخد باله ، وهي ديه فكرة التنويم الضمني ، ببساطة انك تربك الشخص او العقل الواعي للشخص بكذا معلومة في نفس الوقت والعقل الواعي مبيستقبلش اكتر من 9 معلومات .. وده بيخليه يدخل في الترانس وفي خلال ماهو بيحاول يفك نفسه من الحالة ويربط المعلومات كلها في نفس الوقت بتديله اقتراح ما ، بيلقطه وبيعدي جواه من غير اي مقاومة نفسية ..

خليني اقولك مثال :

انت عارف يا مان امبارح كنت في السيد زينب ، قابلت تلاتة وعشرين اجنبي ، اتنين روس تلاتة امريكان عشرة هنود و 8 يوغسلافيين ، بصيت تحتي لاقيت 100 جنيه 4 عشرات وعشرين وعشرتين و 4 خمسات كانوا بيلمعوا الساعة ساعتها كانت 12 والدنيا حر والناس معدية وانا واقف بفكر اخدهم ، وانت عارف لما تبقى قدامك فرصة لازم تاخدها من عالارض حتى لو محدش واخد باله ، ببص فوق لاقيت واحد امريكي لابس تيشريت مكتوب عليه الدنيا لسة بخير ياسطا ، بيقولي بالعربي المكسر وتخيل انت شكله وهو بيقول "ديه فلوسي انا ماي موني" قولتله اتفضل انا كنت بجيبهالك انت ...

تمام ، انا مش عارف احاسيسك في القطعة ديه ايه ، بس كل الي انا متاكد منه اني ولو للحظة ربطت عقلك وخليتك تفكر في كذا حاجة في نفس الوقت وفي خلال اللحظة ديه قولتلك "لما تبقى قدامك فرصة لازم تاخدها " وكملت كلامي عادي وانهيت القصة بتاعتي ، ده اسمه Nested Loop وديه تقنية في التنويم الايحائي ، بس الي حصل ان فيه اقتراح عدى انا زرعتهولك في وسط الكلام ، انت خدته كانه حاجة مسلم بيها ، تخيل مثلا لو جيت بعد القصة ديه وقولتلك اسكت جيبتلك حتة عربية بس ايه فرصة جامدة جدا الطبيعي انك على الاقل تاخد خطوة واضحة جدا علشان تحصل على الفرصة ديه، اراهنك انك لو جربت ده دلوقتي مع حد بس مش لازم عربية يعني ، شربه لبن مثلا او خليه يعمل اي حاجة علشانك ، اراهنك انه هيعملها ، ومش هيفكر مرتين ..

واحد صاحبي بيكلم بنت مرتبط بيها وفيه بينهم مشاكل كتير وهي عايزة تسيبه قالها "انا عايز اعتذرلك ونكمل مع بعض؟" قالتله "سوري انا مبخاطرش بقلبي" ، لما قالي كده قولتلها هايل اتصل بيها وقولها الاتي :

"انا عارف انك مش ممكن تخاطري بقلبك تاني ، بس انتي عارفة اد ايه انا نفسي اعمل اي حاجة علشان (خاطرك) انتي دايما في كل وقت (بتخطري) على بالي وبفكر اد ايه انتي مهمة اوي في حياتي ، علشان كده بحب اوي لما تيجي (خاطر) في خيالي ، ومن فضلك (بخاطرك) ماتزعليش مني لاني مش ممكن (اخاطر) بنفسي بس علشانك انا مستعد (اخاطر) بحياتي كلها كله علشان (خاطرك) علشان كده ياريت يا ... تفكري بجدية اننا احنا الاتنين (نخاطر) سوا علشان علاقتنا تستمر"

البنت مفكرتش بجدية ، قالتله "انا كنت مستنية منك تقولي الكلام ده علشان اعرف خاطري عندك اد ايه وانا موافقة ..."

تحفة هه ؟ مش لازم تكون عارف كلمة في التنويم علشان تفهم انا قولت ايه ، انا استخدمت الكلمة الاعتراضية بتاعتها في كذا جملة بكذا معنى مختلف وشتتها واربكتها وفي الاخر اديتلها اقتراح مخدش وقت مني والرد مخدش وقت منها ..

وفي حادثة قريت عنها قريب عن طريقة جديدة بيعملوها علشان يخطفوا الناس ، لذيذة اوي بس محتاجة ممارس ، واحد عجوز او كبير بيوقف واحدة ويطلب منها تقرى اسم دوا مكتوب على علبة بخط الايد وبعد ماتقرى هو يمشي وهي تمشي وراه ... بمنتهى البساطة ، هو قال ايه عملها ازاي ده الي انت هتعرفه لما تتعلم اكتر عن تقنيات الارباك والاقناع بالتنويم الايحائي

تقنيات الارباك والاقناع في التنويم الايحائي عددها كبير اوي ودايما بتاخد مش اقل من 7 ايام مني علشان اشرحهم في دورة كاملة ، لحد ما اعمل الدورة في شهر 8 عايزك وانت قاعد عالنت تدخل على جوجل وتدور على اي معلومات مرتبطة بال conversational hypnosis

للاسف هتلاقي مراجع انجليزي بس وده لان مفيش مدربين عرب بيتكلموا في الموضوع ، ولما تقرى وتفهم طبق على اد ماتقدر علشان في الدورة هتكتشف ان كل حاجة بتتعلمها بقت مهارة جواك محتاجة منك انك تمارس وتطبق وان شاء الله هعمل محاضرة قريب تمهيدية للدورة ديه في العجوزة احب انك تحضرها لو .....أنت محتاج تحضرها.

ولحد ماشوفك تاني ، عايزك تعمل تمرين مهاري بيخليك اكتر استيعاب للي بيحصل حواليك ، التمرين بسيط اسمه heighten your awareness state

وطريقة عمله بسيطة ، كل الي انا عايزه منك انك لو لابس نضارة تقلعها ، وتبدا تبص على حاجة قدامك وفي خلال مانت باصص تبدأ توسع دايرة النظر وتاخد بالك من حاجات تانية حواليك وانت لسة مركز عينك على الحاجة الاولى ، وانت بتعمل كده عايزك تاخد بالك من 3 او اربع اصوات سامعهم وفي نفس الوقت 3 او 4 احاسيس انت حاسس بيهم ، فبتبقى شايف بشكل لا تركيزي وفي نفس الوقت سامع وفي نفس الوقت حاسس، انا مش هقولك اد ايه ده هيفيدك جدا لما تعرف انك هتستخدم المهارة ديه في التنويم الايحائي علشان تلقط اشارات التنويم بس انا عايزك تكتشف بنفسك تاثير ده عليك لما تعمل كده وتتمرن عليها وتشوف الدنيا بشكل مختلف..

نهاد رجب حسن

مؤسس الشبكة العربية للتنمية البشرية
معالج متخصص في العلاج بالتنويم الايحائي
http://www.nihadragab.com

التنويم الضمنى- تقنية الربط المزدوج والربط الوهمى

التنويم الضمنى- تقنية الربط المزدوج والربط الوهمى 

تحب تقرى المقالة ديه للآخر ولا تقراها كلها وبعد كده تكملها للآخر ؟؟

بلاش ديه

تاخد الكيس الاسمر ولا الاسود ؟

بلاش ديه

تحب تروح السينما نتفرج على فيلم ولا تحب ندخل عمر وسلمى؟

طيب خد ديه

تشرب اللبن وتذاكر ولا تذاكر وانت بتشرب اللبن ؟

ده اسمه الربط الوهمي معناه اني اخيرك بين اختيارين الاتنين نفس الاختيار.. تعالوا نشوف الربط المزدوج ونرجع للوهمي تاني ، نفسيا الانسان بيحب الاختيارات وبيكرهها ، انا مش فاهم حاجة

عملوا تجربة على اتنين ، الاول ادوله نوع واحد من الاكل وطلبوا منه انه ياكل ، والتاني ادوله 6 انواع وقالوله كل ، ومع انتهاء التجربة اكتشفوا ان الي كان قدامه نوع واحد اكل اكتر من الي كان قدامه 6 اختيارات واستنتجوا ان الانسان مبيحبش الاختيارات ، بس في نفس الوقت تسويقيا زعماء الاقناع اكتشفوا ان الانسان بيحب يعرف انه متحكم في اختياراته وانه بيختار، وده الي بيحصل في البرمجة العصبية لما تلاقي المبرمج بيطلب من الشخص انه يبدأ يقوله الالم موجود فين في جسمه ، المريض يقوله في معدتي مثلا ، يقوله طيب مدور ولا مربع؟ ملون ولا ابيض واسود وهكذا، ويبدأ المعالج يطلب من المريض يغير شكل الالم ففعلا في النهاية بيحس المريض انه بقى احسن ، بمنتهى البساطة لانه حس انه متحكم في الالم بشكل ما ، جيه متخصصين التنويم وحطوا القانونين دول في تقنية اسمها الربط المزدوج ومعناها انك تعرض على الشخص اختيارين يختار بينهم زي مايحب لان ده هيمنعه انه يحاول يطلع برة الاختيارات ديه ويشوف حاجات تانية ، بمعنى لو قولتلك ، ايه ياجميل تحب تمضي بالقلم ده ولا ده ؟ الي حصل كالآتي ، اولا انا شغلت تركيزك عن الي انت هتمضي عليه اساسا وبدأت اخليك تركز على القلم الي هتمضي بيه ، فانا دخلت اقتراح وثبته جواك وعملتلك تغيير اتجاه المقاومة فاديتك حاجة تانية تعترض عليها بدل ماتمسك في الفكرة الاساسية وترفضها ، غيرتلك اتجاه المقاومة علشان اخليك تختار قلم من الاتنين وتمضي ، كبيرك انك تزعق وتضربني وتقولي "لااااااااااااا انا لا يمكن امضي الا بالقلم بتاعي" ، ماشي ياجميل امضي بقلمك ، بس في النهاية انت هتمضي على الي انا عايزه وده الاهم ، تعالوا نتخيل موقف ..

س : حبيبي واحشني اوي هتيجي امتى عالعشا ؟ (ربط – انت كده كده جاي عالعشا يحمادة بس بدري ولا متاخر؟)

ح : لا ياحبيبتي انا احتمال اتاخر عالعشا (لبس)

س : طيب ياحبيبي ربنا معاك ، خد بالك من نفسك ، تحب تاكل مسقعة ولا تخلي امك تعملك سندوتشات ؟

ح : لا طبعا امال انا متجوزك ليه ، اعملي انتي الاكل يخدامة

س : طول عمرك ذوق

للإيجاز الربط المزدوج هو انك تدي للشخص اختيار من اتنين علشان يعمل سلوك ما موحد ، زي ماقولنا انك تخيره بين اختيارين وتضمينيا تديله اقتراحك او الامر الي انت عايزه ينفذه ..

مثال تاني : "تحب تاكل دلوقتي ولا كمان ساعة ؟" انت اديته اختيارين "دلوقتي ولا كمان ساعة" والامر المتضمن "الأكل"

اما بالنسبة للربط الوهمي فده اكتشفته من خلال تجربة شخصية ، وفيها ممكن تدي لحد اختيارين علشان يعملوا سلوك موحد ، بس ساعات بنحتاج ان الشخص يعمل حاجة واحدة ومينفعش يبقى فيها اختيارات فالحل اننا نديله نفس الاختيار وببساطة نغير في طريقة عرضه ..

مثال : "تحب نرجع البيت مشي ولا ناخدها موتورجل؟

"تحب نروح السينما ولا نتفرج على ابراهيم الابيض؟

"تحب تدخل دورة التنويم ولا تسجل فيها دلوقتي وتدخلها بعدين ؟

في التنويم العلاج بيستخدم الربط المزدوج في العلاج وده من خلال الاسئلة مفتوحة النهايات وديه تقنية اتكلم عنها ملتون اريكسون رائد التنويم الايحائي في العصر الحديث واستخدامها ان الشخص تحت التنويم ممكن تقوله "انا مش عارف المشكلة هتتحل ازاي او امتى ؟ هل لما تروح البيت ؟ ولا لما تصحى من النوم ؟ ولا وانت ماشي في الشارع بتصفر؟ النهاردة ولا بكرة ولا حتى في خلال اسبوع"

نفس التقنية ديه بتستخدم في التنويم الضمني اي طرق الاقناع في حالة اليقظة ، لما تقول لحد ، انا مش عارف انت هتشتري العربية كاش ولا اقساط ، وهتركبها وهتسوقها ولا هتخلي حد من عيلتك يسوقها ومش عارف هتشتريها دلوقتي ولا في خلال الاسبوع ده بس كل الي انا عارفه انها انسب عربية ليك"

في خلال دورة التنويم الضمني هنتكلم اكتر باسهاب عن تقنية الربط المزدوج والوهمي وهتتعلم اكتر على ابعاد مختلفة ليهم ، انا مش عارف انت هتسجل من دلوقتي معايا ولا لما اعلن عن الدورة بس في الحالتين مفيش حد مبيسجلش ميكونش مبيعرفش ميختارش بين كذا اختيار ، هستناك هناك ;)

نهاد رجب حسن

مدرب تنويم ضمني

معالج بالتنويم الايحائي

مؤسس الشبكة العربية للتنمية البشرية

http://www.arabhd.com

http://www.nihadragab.com

تقنية الاقناع بالافتراضات المسبقة- تنويم ضمنى

تقنية الاقناع بالافتراضات المسبقة - تنويم ضمنى

بسبب مقالات التنويم الضمني ، بقى يحصلي مواقف طريفة في الاول كنت بضحك منها لكن دلوقتي بقيت اتصدم لما اقع فيها ...

اولهم كانت بنت بتحكيلي عن مشكلة ليها ، وبعد ماعرضت المشكلة قالت "بليز انا عايزة اعرف رأيك بس متجاوبنيش بالتنويم" انا استغربت بس ضحكت ، بعد كنت كل ماكلم حد يقولي "نهاد انت بتحاول تنيميني صح ؟ هه ؟ صح ؟ " اقوله وربنا ابدا ، والي يقولي "نهاد والله العظيم هزعل منك بجد انا مبحبش حد يقنعني غصب عني" وانا ابرق وارفع حاجب واقول "هو انا عملتلك ايه دلوقتييييييي" او "على فكرة انا بقيت اخاف منك" ـ انا مبقتش محتاج غير اني اوطي صوتي شوية علشان اي حد يعرفني يقول "بس .. نهاد هينيمني"...

فيه تقنية في التنويم الضمني بتعتمد انك تقرى افكار الناس وتعرف هما بيفكروا في ايه ، ببساطة انك وانت ماشي عادي جدا تبص لشخص ما ، وتشوف هيئته واول فكرة عقلك يجيبها استخدمها وابني منها قصة ، يعني ممكن تقول في سرك طبعا "الراجل بيشتغل شغل حكومي ، ومراته خنقاه ومطلعة عين اهله وعنده عيال منهم في الثانوية العامة وهو موطي فده معناه ان الدنيا كلها عليه وهكذا" وتستمر على كده وبعد ماتخلص تروح تساله لو ده صحيح بس طبعا بشكل متحضر ومش واضح ، ممكن تتعرف عليه وتقوله "ازاي حضرتك انا مش عارف لو كنت فاكرني ولا لا بس تقريبا انا شوفت حضرتك قبل كده ، مش انت برضه بتشتغل في شغل حكومي ؟؟؟ ومراتك خنقاك ومطلعة عين اهلك ؟؟ والدنيا مضيقاك علشان كده انت موطي؟" مرات ممكن تيجي معايا غلط ويقولي "والله يبني انا مش متجوز ربنا يسمع منك بس انا موطي علشان الحزام مقطوع وخايف البنطلون يقع مني فابعد عن طريقي" ومرات بتيجي صح وبتكتشف ان فيه حاجات بتقولها بتبقى صح ، الموضوع ملهوش قوانين بس بسبب حاجة زي كده اشتغلت على تاكسي 12 ساعة ، بركب الناس اوصلهم وفي السكة اسالهم اذا كنت صح ولا غلط ، الي يقولي اركن على جمب ياكابتن ، والي يضحك ضحك هستيري ، والي تقولي لا لا لا انت غلطان طبعا بس احساس جوايا بيقولي اني مش غلطان .. كل ده علشان اطبق تقنية واحدة فمن كتر الاندماج في تقنيات التنويم ، الناس الي يعرفوني قالوا الواد ده مجنون ، وهيبوظ عقول الناس ، مع ان الموضوع في منتهى البساطة ..

انا عارف ان تقنيات التنويم قوية ، واحد امبارح بيقولي امتى مبتنجحش ؟ قولتله مينفعش متنجحش ، علشان كده هي فعالة جدا وانا عارف الدورة الجاية في التنويم هتبقى اول دورة في مصر ومش بعيد في الشرق الاوسط الي بتكلم فيها عن التنويم الضمني، علشان كده خلوني اشارككم تقنية مفضلة عندي في التنويم الضمني للاقناع اسمها "الافتراضات اللغوية"

الافتراضات ...

وفي خلال مانت بتتعلم التقنيات ببساطة عايزك تقرى الاتي :

"عمرو دياب عمل شريط اسمه وماله مايعمل هو عيب ، الراجل مجتهد وعجباني طريقته بتخليني اسمعه وافكر في كلمات اغانيه مشهورة اوي في مصر وبرة ..."

جميل ، الجملة الي انا كتبتها عن عمرو دياب ملهاش اي صلة بالموضوع ، غير انها بتعمل حاجة معينة اولا ارباك لاني مستخدم فيها تقنية "تغيير المعنى" عملتها تلات مرات ، وانا بقولك "شريط اسمه وماله".. المفروض احط نقطة وابدأ جملة جديدة بس انا معمتلش كده انا استخدمت اخر كلمة في الجملة وعملت جملة جديدة "مايعمل هو عيب" اما الافتراض الحقيقي هو جيه قبل ماتقرى الجملة اساسا "وفي خلال مانت بتتعلم التقنيات ببساطة" ، واحتمال كبير متكونش خدت بالك من الجملة بس الافتراض الي دخلك وانت معترضش عليه انك بتتعلم التقنيات ديه وببساطة فمعندكش فرصة انك تعترض او تقاوم او تجادل ، وبعد مافترضت قولتلك جملة مربكة ببساطة علشان اودي عقلك بعيد عن الجملة الي قولتهالك علشان عقلك ميحللهاش ويبدأ يرفضها ...

الافتراضات اداة في منتهى الجمال واداة خاصة انا بحب استخدمها ، لان محدش بيقاوم افتراض واسهل طريقة للاقناع وفي نفس الوقت في المثال الي فات انا اقدر اقولك اني زرعتلك فكرة بس مكملتش ، لو عايز تعرف اكتر عن زرع الافكار شوف النوتة الخاصة بيها ..

بتتكون الافتراضات من تلات انواع "الادراك – الزمن والتزامن – الصفات" وده معناه انك لو استخدمت التلات انواع دول هتكون جملة في منتهى القوة تلغي بيها الوعي وتوصل بشكل مباشر للاوعي ..

لما اقولك "اخيرا فيه مكان النهاردة في السينما" ، فده معناه ايه بالنسبة لك ؟ معلومات اكتر انا مقولتهاش ، بس انت ممكن تقولي انه مكنش فيه امبارح ، مع اني مقولتش بس انا خليتك من البداية تدرك او تلاحظ ، ولما عملت كده انت معترضش انت بدأت تبني على ادراكك الجديد معلومات جديدة ..

ده بالنسبة لأول نوع الا وهو "الادراك" طيب لو جيت قولتلك "انت عارف يا حمادة كذا وكذا وكذا وتالت حاجة عايز اقولهالك انك بتذاكر بتلقائية..." ده هيخليك تقول "ممم تالت حاجة هو كان فيه تاني حاجة واول حاجة؟؟؟" في الوقت الي هتسأل فيه نفسك عن اول وتاني حاجة ، جملة "انت بتذاكر بتلقائية" دخلت في عقلك وعدت من غير ماتلاحظ وفي نفس الوقت كلمة بتلقائية هي تالت نوع من انواع الافتراضات ، افتراض الصفات ، لانك لما تسمع جملة "انت بتذاكر بتلقائية" كبيرك انك تقول لا طبعا ، "دانا بذاكر بصعوبة" والي انت مش واخد بالك منه انك في الحالتين ؟؟؟؟ بتقر فكرة المذاكرة وانك بتذاكر،

الافتراضات الصفاتية بتخلي ذهن الشخص يركز على الصفة مش المعلومة ، بمعنى اني بقولك "على فكرة الراجل ده بيجري بسرعة" فانت مش هتبدأ تلاحظ الجري ، انت هتشوف هل هو فعلا بيجري بسرعة ولا لا" غير لما اقولك "الراجل ده بيجري" ساعتها هتشوف الفعل نفسه "الجري" وممكن تعترض وتقولي لا ده مش عارف يجري ، لكن في المثال الاول غالبا هتقولي "لا بيجري ببطىء" ...

تعالى نشوف ازاي الافتراضات التنويمية مستخدمة في الاقناع ، فرضا عايز تقنع حد انه ممممم يذاكر مثلا ..

"اقولك سر؟ اليوم النهاردة حر اوي والواحد ميحبش يخرج في الحر بس ممكن يعمل حاجة هو عايز يعملها في بيته علشان كده في خلال مانت قاعد وبتذاكر بنشاط في بيتك هتلاحظ انك اساسا مبتحسش بالحر ، وده معناه انك بتندمج اكتر مع المذاكرة وبتنسى الجو البشع ده ، سبحان الله ، الواحد في البرد بيتمنى الحر وفي الحر بيتمنى الشتا ييجي الشتا وننسى ونقول امتى يجي الصيف ليه برضه جماله في بعض الاوقات التانية الي انت بتذاكر فيها ، هتلاقي ان في خلال مانت بتذاكر دلوقتي الشمس بدات تخف واليوم قرب يخلص ومعلوماتك بتزيد اكتر واكتر ولما بتركز في المذاكرة حالا هتلاقي ان ده بيخليك تنفصل عن اي حاجة بتحصل ، شعور جميل مش كده ؟ بالذات في الجو الحر ده ، ولا انت شايف ايه ؟"

انا استخدمت في القطعة ديه كذا تقنية من تقنيات التنويم الضمني بس ركزت اكتر على الافتراضات واكيد انت طلعت بكام افتراض وفهمت الموضوع ماشي ازاي ، علشان كده في الوقت الي هتحس فيه انك عايز تعرف اكتر واكتر اكيد هتعرف توصلي في خلال الدورة الي جاية ان شاء الله ، قريب هنشر تفاصيلها وهنتعرف مع بعض على تقنيات كتيرة في التنويم الضمني الي ممكن تستخدمها وانت بتتكلم عادي جدا ومحدش واخد باله غيرك وساعتها هتبص على الوقت ده وتلاحظ ان حاجات كتير اوي اتغيرت في حياتك وهتستمتع بالتغيير الجديد ...

نهاد رجب

مدرب تنويم ضمني

معالج بالتنويم الايحائي

مدرب تنمية بشرية

مؤسس الشبكة العربية للتنمية البشرية

http://www.arabhd.com

كنت بتحب وحبيبك سابك؟ جرب تقرى المقالة دية وتركز فيها

كنت بتحب وحبيبك سابك؟ جرب تقرأ المقالة دية وتركز فيها

اولا المقالة ديه مكتوبة بلغة تنويم ضمنية عالية جدا واحترافية


 اوي ، فقدامك حل من اتنين لايما تركز وانت بتقرى او انك


 تخلي حد يقرهالك وتاثيرها هيبقى اقوى بشكل م

كام واحد ممكن يكون حس ان حياته انتهت بسبب ان فيه طرف


كان فيها وكان جزء اساسي ومشي وبعد عنها ؟ انا مش بتكلم 


عن الموت بس بتكلم عن انك تكون / تكوني بتحبي حد اوي


 اوي وفجأة تبقى قدام أمر واقع انك لازم تنفصل عنه وتكمل 


حياتك لوحدك ؟ انا مش عارف لو انت عارف ده فعلا بس 


غالبا ده حصلك انت شخصيا ، فيه ناس فينا كملت وعدت 


الموضوع وناس اتألمت بشكل مبالغ فيه ، بتحصل ، ممكن 


تكون حاولت تكلم حد بس واجهتك مشكلة ان ممكن الناس 


تتريق عليك ، او ممكن يكون في حد في دماغك مش قادر 


تنساه مع انه بعد ومشي وسببلك جرح ومع ذلك انت عارف 


انك ممكن ترجعله تاني لو بس حاول معاك ..


انت ممكن وممكن متكونش ادركت اهم حاجة في الموضوع ،


 ان الحب الي بينتهي بانفصال مكنش حب من البداية لانه لو


 كان الحب ده حقيقي كان زمانه اكتمل مهما كانت الظروف ،


 او التحديات او المواقف والمشاكل الي مريتوا بيها ، محدش 


فيكم ضحية ومحدش فيكم السبب ، وليام بليك قال ان الضحية 


هو الشخص الي بيبقى عارف انه هيتعب وهيفشل ومع ذلك 


موافق انه يدخل في تجربة هو عارف اخرتها ايه .. انت تعبت 


كتير وفكرت كتير وساعات مكنتش بتعرف تنام ولما كنت 


بتشوفه تاني من بعيد كان قلبك بيدق ونفسك تجري عليه وفي


 نفس الوقت بتبقى عارف ان فيه حاجة مانعاك انك تروحله وده 


معناه انك قررت من جواك انك تبعد علشان انت عارف ان 


القرب بينكم مستحيل بس ديه حاجة انا وانت عارفينها بس فيه 


جزء جواك مش راضي يدرك ده لحد دلوقتي لانه مش فاهم 


قوانين البشر ومش عارف يتآلف معاها ويصدقها .. الواحد 


يقدر ، انت عارف انه يبعد بسهولة ، ويستمر بحياته ويحب 


تاني وتالت ورابع وعشرين ، وانت مش مضطر انك تحب 


تاني وتدور على حب تاني ينسيك حبك الاولاني ، لانك مش 


لازم تحب حد تاني علشان تنسى الاولاني ساعات بيبقى لازم 


تنسى الاولاني قبل ماتعرف تحب تاني ، علشان كده بتواجه 


اغلب الناس الي مروا بالمشكلة ديه مشكلة اكبر ، بيبقى قدامه 


كذا فرصة للارتباط وبيحاول انه يدخل فيهم بس بيكتشف انه 




بيفشل كل مرة وبيرجع السبب للطرف التاني الغير متفاهم او 


المجادل او او او ويبدا يقول اسباب ملهاش حصر بس لمجرد 


انه مش عايز يعترف انه هو شخصيا مش قادر ينسى .. لما 


وقعت في نفس المشكلة قابلت واحد وقالي "وداويني بالتي 




كانت هي الداء" قولتلها ازاي ؟ قالي حب واحدة تانية وهتنسى


 الاولى ، قولتله بس افتكر ده غلط قالي خلاص اشتغل وانجح


 وانتقم لان احسن طريقة للانتقام من حد هو انك تنجح وتكمل 


.. حسيت كان كلامه دخل جوايا انا مش عارف لو الكلام ده 


بيلمسك انت كمان ولا لا ، واحتمال انت شخصيا متكونش 


عارف بس الواحد مبيبقاش عارف ايه انسب حاجة ليه في كل


 وقت ، الا بعد ماياخد قرار وبعد فترة يبص تاني ويقول انا 


كان المفروض اعمل كذا وكذا ، احتمال تكون عايز انك تنساه 


لدلوقتي وتبدأ تاخد حياتك لمكان احسن ، اجمل وافضل من 


غيره ، بس انا مش عايزك تعمل ده بسرعة دلوقتي وتاخد قرار


 دلوقتي الا لما تكمل قراية ، لو قريت للاخر ساعتها تقدر انك 


تلتزم بقرارك مهما كان ولما تلتزم بيه هتكتشف انك وصلت 


لدرجة الفهم وفي النهاية هتلاقي الموضوع بسيط وسهل ، انا 


مش عارف انت هتقرر انك تنسى دلوقتي ولا انك تبدأ تفهم 


الاول انت محتاج تنسى ليه ، خليني اسالك سؤال ، ايه الي


 هيحصل لو بعد عشر سنين من دلوقتي وبعد ماتكون فهمت 


وخدت قرار انك تكمل حياتك بقوة ؟ تخيل هتبقى عامل ازاي ؟ 


بتفكر ازاي ؟ شغلك ، حياتك الاجتماعية النفسية ، الشخصية 


سميها زي ماتسميها بس انا عارف انك هتبقى افضل من دلوقت


ي بكتير ، خليني اقولك على سر ، الواحد يقدر دايما انه يفهم 


ولما بيفهم بيبدأ يحس ان الموضوع بالنسبة له بقى اسهل بكتير


 ، مش كده ؟ وعلى رأي المثل ، اذا عرف السبب بطل العجب


 ، حاجة عاملة زي عجلة بتدور ، ومبقاش ليها فايدة انها تدور


 تاني وتيجي انت تدرك انها لازم تقف فبتقولها اقفي ، مش 


هتقف لانك انت الي دورتها من البداية ، لازم تدخل منك 


علشان تبدأ توصلها فكرة انها لازم تقف وان مهمتها انتهت 


ساعتها هتبدأ تهدى لحد ماتوصل انها تقف تماما وبأمرك 
هتدور تاني من اول وجديد بجب جديد وبفكر مختلف ، لانك لو


 حاولت انك تودي العجلة لاتجاه مختلف ، هتروح للمكان الي


 انت عايزه بس ساعتها لو كانت دايرة بفكرة قديمة هتبقى قوة 


الدفع بتاعتها الفكرة القديمة لانها لسة مماتتش ومنتهتش فلما 


توصل للمكان الي تحدده هتحس ان ده مش مكانها لان الشخص


ده مكنش موجود من البداية ..

انا موافقك انه صعب النسيان لاني جربت بنفسي ،


 بس كل حاجة صعبة بتبقى سهلة في النهاية لما 


بنكتشف اننا حققناه فعلا صح ولا لا؟




علشان الي مبيموتكش بيقوك فده معناه انك تقدر 


دايما تتحسن من اي اثر لاي علاقة قديمة ومن اي


 حد اذاك واذى مشاعرك و زي ماحصل في حياتك 


قبل كده انك انفصلت عن حد كان اهم في حياتك 


فانت عارف انك بسهولة تقدر تنفصل وتنسى تماما 


الشخص الي انت عارف انك المفروض تنساه ، لانك


 لما بتنساه دلوقتي حالا بتبدأ تحس من جواك ان 


مممم كان المفروض ده يحصل من زمان ، وساعتها


 لما بتعرف انك نسيته بتلاقي ان الحياة بقت اسهل


 وبتعرف انك تبدأ تفكر في حد جديد او هدف جديد 


لنفسك ، حتى هتعرف تختار كل الي انت عايزه 


بنفسك وتعيش الحياة الي بتختارها بنفسك وتختار


 الالوان الي بتحبها سواء كانت احمر او اخضر او 


اصفر انا شخصيا افضل ليك الاحمر ...


وبعد كده حاول تفتكره تاني ، حاول على اد ماتقدر


، حاول معلش بس حاول تاني جرب حاول تفتكر اي 


موقف بينه وبينك ، الموضوع بيصعب كل مرة ، وكل 


مرة بتفتكر موقف بتكتشف انه فقد اهميته بالنسبة


 لك لانك بتقرر انك تنساه والنسيان ده في حد ذاته 


قرار العقل خدته ووصله للعجلة الي بتدور بسببه 


وبتبدأ العجلة تقف ولو حاولت انك ترجع الفكرة تاني


 علشان العجلة تتحرك تاني هتكتشف ان الفكرة 


مش كفاية وان العجلة مش هتدور لنفس الشخص


 مرتين ، انا مش عايزك تنسى لان النسيان مش 


هو الحل بس ساعات بنكتشف اننا نسينا من غير 


مانقرر ننسى مين وفين وامتى وازاي ننسى 


دلوقتي ولا بعدين وليه نحاول ننسى والنسيان 


نفسه شىء عادي جدا بيحصل كل لحظة وكل يوم 


، كل ثانية وكل دقيقة بننسى بننسى ناكل ساعات


 وبننسى حاجات مهمة جدا وبتنسى .. اقرب الناس


 ليك وبتنسى انك تعمل اي واجب عليك وبتنسى 


وبتقى عارف انك فعلا نسيت ... حاجات مبتتنسيش ..


خليني اقولك فزورة ، لو قدامك تلات احبال مربوطين


 بعقدة (جمع حبل) ومحتاج انك تقطع العقدة الي 


بينهم ، هتختار ايه تقطعهم بيه ؟ هتختار عقلك ولا


 السكينة ؟ .... مش محتاج تفكر كتير ... عقلك .. 


لانه هيقولك تختار السكينة الي هتقطع بيها الحبل


 وتخلي التلات احبال لوحدهم بشكلهم الطبيعي الي كانوا عليه ..


مفيش مشكلة ملهاش حل ومفيش سبب يخليك 


تحتفظ بحاجة انت عارف انك مش محتاجها ولازم 


تتخلص منها دلوقتي ، لما كنت في شارع حسين


 حجازي ، متفرع من قصر العيني قابلت عمي ، 


عمي الكبير ، اكبر عمامي التلاتة ، كل واحد فيهم 


في دولة ، الاول في مصر والتاني في الكويت 


والتالت في السعودية قابلت المصري كان جاي 


يزورنا ولابس بنطلون مقلم وقميص مشجر ومسرح 


شعره على جمب وكان شكله يختلف عن كل مرة 


شوفته فيها وماسك نفسه وبيقولي مالك قولتله 


على الي حصل قالي انك هتقدر تتغلب على 


المشكلة ديه مع الوقت وهتتعلم منها .. حسيت 


ساعاتها انه مجرد بيساعدني علشان انسى بس


 افتكرت كلام الطرف التاني لما قالي في اي حاجة


 قالهالي قالي متفتكرش اني هفكر في الي هتفكر


 فيه ، لاني فعلا بدات افكر بفكر مختلف تماما عن 


الي كنت بفكر بيه ... حاجة وحشة مش كده برضه


 بقولك تاني انك بتتحسن مع كل يوم يعدي عليك 


بتعرف انك اقوى من اي حد تاني غيرك قالي نفس


 الكلام وبقيت احكيله قصة لما انتهيت منها قالي 


غريبة ان الواحد يتمسك بالشر ويدعي في نفس 


الوقت ان ربنا يحميه منه ... قولتله ايه القصة ؟ قالي ...


من الوف السنين كان بيعيش مخلوق اليف ، بش 


شكله مخيف ، كانت الناس بتهرب منه وكان عباس


 اسمه وسنه اكتر من 300 سنة ، في الوقت الي 


الناس كانت بتعيش فيه كتير ، كان فيه امير بيحكم 


البلاد ، امر الوزرا والعباد انهم يجيبولوا المخلوق لحد


 عنده يستجوبه انت ليه شكلك كده ، رد عليه 


بالشكل ده ... "انا من سنين كنت اجمل الناس ،



لحد ماقابلت حد خنته وسبته ولما سبته لعني ، 


وبقى شكلي كده .." ولأن كل واحد يقدر انه يسيب 


زي ماقدر انه يمسك فالمخلوق اختار انه يسيب لما 


عرف انه مكنش يقدر يكمل ويمسك ، بس التاني 


مفهمش ده ، رد الامير وقاله والي يكسرلك لعنتك 


ويخرجك ؟ قاله احبه وابقى دايما معاه في اي مكان 


يبقى فيه .. قاله غمض عنيك وتخيل نفسك 


مقابلتوش من زمان ، وماقد كان يظل في الحسبان 


... صحي عباس وعرف انه مبقاش مجرد مخلوق 


ضعيف ولا حتى حد شكله مخيف ، بقى جميل 


ومبسوط وحضن الامير وقاله .. انا مكنتش ملعون ،


 انا الي خليت اللعنة ليها قوة عليا لما مسكت فيها


 وقررت اني اتبناه واعيشها واعيش جواها ولما 


سمعتك بتتكلم فهمت سر مكنتش فاهمه من زمان 


...


سالته وايه الرابط بيني وبين القصة ؟ قالي احتمال


 متكونش عارفه دلوقتي بس انا متاكد انك هتعدي 


عليك لحظة وهتفهم ايه كان الرابط وساعاتها 


هتعرف ايه الي هتختاره علشان تفك الربط بيه ..


واحتمال انت كمان تكون عرفت ازاي تقدر تفك الربط


 الي بينك وبين اي حد لازم تنساه ، واحتمال 


متكونش ادركت لسة الطريقة لكده بس جواك في



مكان ما فيه حاجة فهمت واقتعنت وهتبدأ تاخد 


موقف وقرارات ، انا مش عارف انت هتحس 


بالاختلاف دلوقتي ولا من اول النهاردة ولا لما تنام 


وتغمض عنيك وتصحى وتحس انك بقيت فاهم اكتر


 وعارف اكتر عن حياتك ...


نصيحتي ليك انك تسامح وافتكر دايما الذكريات 


الكويسة مهما كانت ساعتها اي الم هتحس بيه 


هيختفي وهتكتشف ان اللعنة انكسرت والعقدة 


انحلت ورجعت لنفسك زي زمان احسن واجمل 


واقوى من اي وقت تاني ..

نهاد رجب


اول مدرب عربي في التنويم الضمني
http://www.nihadragab.com